سالا بۆری ٢٥ ھزار عیراقی بووینە قوربانیێن خوەنیشاندانان
ئەڤرۆ نیۆز، قائید میرۆ:
سالا بۆری بۆ وەلاتیێن عێراقی سالەکا تژی ئالۆزی و کوشتن و رەڤاندن بوویە بەرپرسەکێ کۆمسیۆنا مافێن مرۆڤی ژی ئاشکراکرد، رەوشا مافێ مرۆڤی ل عێراقێ د ئاستەکێ مەترسیداردایە و دبێژیت، تنێ ددەمێ دوو ھەیڤێن بۆری یێن سالا ٢٠١٩ێ نێزیکی ٢٥ ھزار کەس بووینە قوربانی.
ھێمن باجەلان، ئەندامێ کۆمسیۆنا مافێن مرۆڤی ل عێراقێ بۆ ئەڤرۆ نیۆز گۆت” رەوشا مافێ مرۆڤی ل عێراقێ د ئاستەکێ مەترسیدارە و سالا بۆری ب ئەگەرێ رێڤەچوونا خۆنیشاندانێن باشوورێ عێراقێ رەوشا مافێ مرۆڤی ب ئێکجاری تێکچوویە و مخابن رەوش گەھشتیە ئاستەکی تشتەک نەمایە بناڤێ مافێ مرۆڤی ل عێراقێ، ئەم پێشبینی دکەین ئەڤسالە ٢٠٢٠ێ رەوش ھێشتا دژوارتر ببیت و مافێ مرۆڤی بھێتە بنپێکرن، چونکە حوکمەتا عێراقێ چو پێنگاڤ بۆ تەناکرنا رەوشێ و بجە ئینانا داخوازیێن خۆنیشاندەران بجە نە ئیناینە، ھەر ل دەستپێکا پڕۆسا ئازادیا عێراقێ مافێ مرۆڤی ھاتیە بن پێکرن، بدیتنامە پاراستنا مافێ مرۆڤی پیڤەرێن خوە ھەنە و دبیت حوکمەتا عێراقێ ب رژدی کار بۆ بجە ئینانا ئەڤان پیڤەران بکەت، ھەیڤا ئۆکتۆبەرا سالا بۆری پێلەکا خۆنیشاندانان ھژمارەک باژێڕێن باشوورێ عێراقێ ڤەگرتن و د ئەنجامدا ٤٩٠ کەس ھاتنە کوشتن و زێدەتری ٢٣٠ ھزار کەس ژ وەلاتی و ھێزێن ئەمنی برینداربووینە، کو بریندارێن گولەی تێدا ھەنە و ھژمارەک ژوانژی ب ئەگەرێ بکارئینانا گازا رۆندک رێژ برینداربووینە.
ھێمن باجەلان ئاماژەکر” ھەر سالا بۆری رەڤاندنا وەلاتیانژی زۆر زێدەکریە، تنێ ددەمێ رێڤەچوونا خۆنیشاندان ٦٨ کەس ھاتینە رەڤاندن و تنێ دوازدە ژوانا ھاتینە ئازادکرن، ھەروەسا ٣٣ حالەتێن دی یێن رەڤاندن ھاتینە تۆمارکرن و ١٥ ژوان ھاتینە رەڤاندن و یێن دیژی سەر نەگرتیە ئەڤان بزاڤێن رەڤاندنێ، کو چارەنڤیسێ وان کەسێن رەڤاندی نەیێ دیارە، چەندین جاران مە ھۆشداریا تێکچوونا رەوشێ و بنپێکرنا مافێن مرۆڤی دایە ھەموو لایەن و حوکمەتا عێراقێ، لایەنێن سیاسی ھەنە لپشت ئالۆزیێن عێراقێ و رەڤاندن و کوشتنا وەلاتیان، ئەو لایەن ئاشکرانە یێن تەقە ل خۆنیشاندەران کری و چەندین خۆنیشاندەر ب رێیا چەکێ قەناسێ ھاتینە کوشتن و ژبلی وەلاتیێن سڤیل ئەندامێن ھێزێن ئەمنی ژی بووینە قوربانی.
