سایلۆیا زاخۆ دێ 21 هزار تەنێن گەنمی ژ جۆتیاران وەرگریت
زاخۆ، دلۆڤان هالۆ:
بۆ ئەڤ سالە سایلۆیا زاخۆ دێ 21 هزار تەنێن گەنمی ژ جۆتیاران وەرگریت، و هەتا نوكە 9 هزار تەنێن گەنمی هاتینە وەرگرتن، و ب ڕێژا 10٪ێ گەنم ژ جۆتیاران دهێتە وەرگرتن».
ئۆمێد سەعدی، ئەندازیارێ چاندنێ ل ڕێڤەبەریا سایلۆیا ئیدارەیا سەربخوە یا زاخۆ بۆ ڕۆژناما ئەڤرۆ دیاركر، گەنم ژ جۆتیاران دهێتە وەرگرتن ل دووڤ ڕێنمایێن تاقیگەهێ یێن كۆنتڕۆلا جۆری ل بەغدا كو ئیراق هەموو پێگیرە ب وان ڕێنمایان، و تێستا گەنمی یا تاقیگەهێ یا فیزیاییە و ل سەر دوو ئاستان دهێتە وەرگرتن، ئاستێ ئێكێ بێ لێبرینە و ئاستێ دووێ یا ب لێبرینە، ئەڤ سالە گەنمێ جۆتیاران ب دوو شێوەیان هاتیە دەستنیشانكرن، شێوەیێ ئێكێ ئەگەر د پلانێ دا بیت ئێك تەنا گەنمی ب 700 هزار دینارانە و ئەگەر ژ دەرڤەی پلانێ بیت ب 500 هزارانە.
گۆت ژی:»ئەڤ سالە ژڤانێ وەرگرتنا گەنمێ جۆتیاران ب ڕێكا مالپەڕەكێ ئەلكترۆنی یە و ڤێ چەندێ ژی كارێ مە و جۆتیاران ب ساناهی كرییە، دەمێ وەرگرتنا گەنمی ژی ل دووڤ پاقژی و كوالیتیا گەنمی دمینیت، ئەگەر گەنم یێ پاقژ بیت پڕۆسەیا وەرگرتنا هەر تڕۆمبێلەكێ د ماوێ 10 خۆلەكان دا ب دووماهیك دهێت و ئەنجامێن تاقیگەهێ دەردكەڤن».
زێدەتر ژی گۆت:»ڕێژەیا وەرگرتنا گەنمی یا ئەڤ سالە یا بۆ جۆتیارێن هەرێما كوردستانێ هاتیە دەستنیشانكرن گەلەك كێمە، بۆ نموونە ئەگەر جۆتیارەكێ نێزیكی 100 هەتا 200 تەنێن گەنمی هەبن، ب تنێ 20 تەن بۆ وەرگرتنێ بهێنە دەستنیشانكرن ئەڤە ڕێژەیەكا كێمە و ل ڤان سالێن دووماهیێ ئەڤ ئاریشەیا كێمیا وەرگرتنا گەنمی بەردەوام هەیە، ژ بۆ ڤێ چەندێ لایەنێن پەیوەندیدار ل گەل بەغدا و وەزارەتا چاندنێ بەردەوام بزاڤان دكەن ڕێژەیەكا زێدەتر یا گەنمێ جۆتیارێن هەرێما كوردستانێ بهێتە وەرگرتن».
