سایلۆیێن دهۆكێ بۆ وەرگرتنا گەنمی د بەرهەڤن و چاڤەرێی حوكمەتا ئیراقێ نە
ڕێڤەبەرێ سایلۆیێن دهۆكێ دیار كر، وان هەموو بەرهەڤی بۆ وەرگرتنا گەنمێ جۆتیاران كرینە و چاڤەڕێی وەزارەتا بازرگانیا ئیراقێ نە بۆ دەستپێكرنا پرۆسێسا وەرگرتنا گەنمی.
نازم ئەترووشی، ڕێڤەبەرێ سایلۆیێن دهۆكێ گۆت: «هەموو كارێن تەكنیكی و لۆجستی ل سایلۆیێن فەیدیێ، شێخان، زاخۆ و ڕۆڤیا ب دووماهی هاتینە، ئەم بۆ وەرگرتنا گەنمێ جۆتیارێن پارێزگەها دهۆكێ د بەرهەڤین، هەروەسا جۆتیارێن هەر دەڤەرەكێ دێ گەنمێ خۆ رادەستی سایلۆیەكا دیاركری كەن، داكو ڕێگری ل قەرەبالغیێ بهێتە كرن».
ڕێڤەبەرێ سایلۆیێن دهۆكێ گۆت ژی: «وەرگرتنا گەنمی دەست پێ نەكریە، چونكی دڤێت لیستا ناڤێن جۆتیارێن هەرێما كوردستانێ ژ لایێ بەغدا ڤە بهێتە پەسندكرن، هەتا سی دی یا ناڤێن جۆتیاران ژ لایێ وەزارەتا بازرگانیا ئیراقێ ڤە نەهێتە پەسەندكرن، ئەم نەشێین دەست ب وەرگرتنا گەنمی بكەین».
بۆ ئەڤ سالە، 116 هزار تەنێن گەنمی وەكو پشكا پارێزگەها دهۆكێ هاتینە دیاركرن، كو 84 هزار تەن د ناڤ چارچۆڤێ پلانێ دانە و 32 هزار تەن ژی ژ دەرڤەیی پلانێ نە.
