سعوديێ دو ئاهه‌نگێن كازم ساهر هه‌لوه‌شاندن
ئه‌ڤرۆنيۆز:
حوكمه‌تا سعوديێ، ئه‌ڤرۆ دوشه‌مبى، دو ئاهه‌نگێن هورنه‌مه‌ندێ عيراقێ كازم ساهر هه‌لوه‌شاندن كو برياربوو ل ريازا پايته‌حت و باژێرێ جه‌ده بهێنه گێران.
ل دووڤ هنده‌ك راپۆرتێن رۆژنامه‌ڤانى وچالاكڤانێن سعودى ل سه‌ر تۆرێن جڤاكى، ئه‌و هه‌ردو ئاهه‌نگێن كو برياربوو ل رۆژێن 28 و 29 ڤێ مه‌هێ ل رياز پايته‌ختێ سعوديێ وباژێرێ جه‌ده بهێنه گيران، ل وان ژڤانێن دياركرى ناهێنه گێران.
رۆژنامه‌ڤانى سعودى (عه‌بدوللا مخارش) سه‌رۆكێ پشكا هونه‌رى ل رۆژناما شه‌رقولئه‌وسه‌ت ئاماژه ب هه‌لوه‌شاندنا وان هه‌ردو ئاهه‌نگان كريه، سايتێ كه‌نالێ (العربيه) ژى ژ زارده‌ڤێ ژێده‌ره‌كى دياركريه كو هه‌ردو ئاهه‌نگ يێن هاتينه هه‌لوه‌شاندن.
ده‌سته‌يا ( ته‌رفيه) يا حكومى يا سعودى كو تايبه‌تمه‌ند ب ڤان جۆره چالاكيان ڤه به‌رى دۆ رۆژان ده‌ست ب ريكلامكرنێ بۆ وان هه‌ردو ئاهه‌نگان كربوو.
كازم ساهر چو داخۆيانى ل دۆر هه‌وه‌شاندنا وان هه‌ردو ئاهه‌نگان نه‌دان، به‌لێ دهه‌مان ده‌م دا گێرانا وان دووپات نه‌كر ده‌مێ سه‌ره‌دانا سعوديێ كرى به‌رى چه‌ند رۆژان، هنده‌ك ژێده‌ر بۆ وێ چه‌ندێ دچن كو دبيت ئه‌گه‌رێ هه‌لوه‌شاندنا هه‌ردو ئاهه‌نگان دزڤريت بۆ نه‌رێككه‌فتنا ده‌سته‌يا (ته‌رفيه) يا حكومى ل سعوديێ ل گه‌ل كازم ساهرى به‌رى راگه‌هاندنا ژڤانێ دروست يێ هه‌ردو ئاهه‌نگان.
هه‌رچه‌نده هه‌تا نوكه ئه‌گه‌رێ سه‌ره‌كيێ هه‌لوه‌شاندنا ئاهه‌نگێن كازم ساهر ل سعوديێ يێ ديار نينه، به‌لێ دووماهى چالاكيا هونه‌رى يا ساهرى ساخكرنا ئاهه‌نگه‌كا هونه‌رى بوو ل وه‌لاتێ قه‌ته‌ر به‌رى دۆ رۆژان ل گه‌ل هونه‌رمه‌ندا سعودى (وه‌عد) ، كو ئه‌ڤ چه‌نده بوويه ئه‌گه‌رێ په‌يدابوونا مشتومره‌كا مه‌زن ل سعوديێ ئه‌وا هه‌موو په‌يوه‌نديێن خوه ل گه‌ل قه‌ته‌رێ برين وتۆمه‌تبار دكه‌ت ب پشته‌ڤانيا رێكخراوێن تيرۆرستى.
