سعووديه ژ په‌يوه‌نديێن مسر و ئه‌مريكا دلگرانه
ئاژانسا رويترز ديار كر كو پشتي ب پشته‌ڤانيا ئه‌مريكا سه‌رۆكێ مسرێ عه‌بدولفه‌تاح سيسي بزاڤا راگرتنا شه‌رێ ل غه‌زه كري و هه‌روه‌سا سيسي يێ بزاڤا هندێ دكه‌ت جاره‌كا دي كاريگه‌ريا خوه ل سه‌ر وه‌لاتێن عه‌ره‌بي وه‌ك به‌رێ زێده بكه‌ت و ئه‌مريكا ژي بۆ به‌رژه‌وه‌نديێن خوه پشته‌ڤانيه‌كا ته‌مام دده‌ته سيسي و به‌رپرسێن سعووديێ ژي ژ وێ يه‌كێ نه‌رازي نه و وه‌سا دزانن كو ئه‌و يه‌ك بۆ لاوازكرنا پێگه‌هێ سعووديێ دهێته كرن.
د به‌رده‌واميا راپۆرتا ئاژانسا رويترز دا هاتيه كو سه‌ره‌دانا جۆن كێري يا بۆ قاهيره و پشته‌ڤاني كرنا ئه‌مريكا بۆ بزاڤێن مسرێ بووينه جهێ دلگرانيا سعووديێ و ژ به‌ر وێ يه‌كێ ژي وه‌زاره‌تا ده‌رڤه يا سعووديێ به‌ريا نها ديار كربوو مه نه‌ڤێت ناڤبژيڤانيا سعووديێ وه‌ك ده‌ستێوه‌ردانه‌كا ده‌ره‌كي لێ بهێت و دڤێت قاهيره تنێ رێخوه‌شكه‌ر بيت بۆ راگرتنا شه‌رێ ل غه‌زه و ژ به‌ر كو سعووديێ وه‌ك پێدڤي پشته‌ڤاني ل وێ بزاڤا مسرێ نه‌كر ئه‌و دانوستاندن ژي نه‌گه‌هشتنه چو ئه‌نجامه‌كێ و ديسان شه‌رێ ل غه‌زه ده‌ستپێ كر و دژوارتر بوويه.
د پشكه‌كا دي يا راپۆرتێ دا ئاماژه ب ناكۆكيێن د ناڤبه‌را سعووديێ و مسرێ دا هاتيه كرن و هاتيه ديار كرن كو ده‌مێ سيسي سه‌ره‌دانا سعووديێ كر داخواز ژ شاهێ سعووديێ كربوو كو پشته‌ڤانيێ ل پێشنياز و بزاڤێن مسرێ بۆ راگرتنا شه‌رێ غه‌زه بكه‌ن و سعووديه بێده‌نگ ما و ئه‌و بێده‌نگي ژي نيشا وێ يه‌كێ بوو كو سعووديه نه‌دڤيا هاريكاريا مسرێ بكه‌ت و ژ به‌ر وێ يه‌كێ ژي قاهيره نه‌شيا رێگريێ ژ دژواربوونا شه‌رێ غه‌زه بكه‌ت.
چاڤدێرێن سياسي ژي ئاماژه ب وێ يه‌كێ دده‌ن كو ژ به‌ر ناكۆكيێن د ناڤبه‌را مسرێ و ب تايبه‌تي ژي ژ به‌ر سياسه‌تا سيسي يا ل هه‌مبه‌ر ئيخوانان گه‌له‌ك وه‌لاتێن عه‌ره‌بي يێن وه‌ك قه‌ته‌ر و ئوردن ناخوازن سعووديه خوه نێزيكي مسرێ بكه‌ت و ژ به‌ر وێ يه‌كێ ژي شاهێ سعووديێ پشته‌ڤاني ل بزاڤێن سيسي بۆ راگرتنا شه‌رێ غه‌زه نه‌كر و ل ئاليێ دي هنده‌ك گرۆپێن فه‌له‌ستيني ژي كو سعووديه و قه‌ته‌ر پشته‌ڤانيێ ل وان دكه‌ن دبينن كو يا سيسي دڤێت بكه‌ت تنێ بۆ باشكرنا پێگه‌هێ خوه و باشكرنا په‌يوه‌نديێن خوه يێن ل گه‌ل ئيسرائيلێ يه و ئه‌و وه‌سا باوه‌ر دكه‌ن كو سيسي دڤێت غه‌زه بكه‌ته قوربانيا په‌يوه‌نديێن خوه يێن ل گه‌ل ئيسرائيلێ و ژ به‌ر وێ يه‌كێ ژي وان داخواز ژ سعووديێ كربوو كو پشته‌ڤانيێ ل پێشنيازا سيسي نه‌كه‌ن و هه‌ر ئه‌و يه‌ك ژي بۆ ئه‌گه‌ر كو جاره‌كا دي شه‌رێ ل غه‌زه دژوارتر ببيت.
