سلێمانى دێ خوه ژ نايابا عيراقێ ڤه‌كێشيت
ئه‌ڤرۆ نيوز:
پشتى ئێكه‌تيا فوتبۆلا عيراقێ سزايه‌كێ دژوار ب سه‌ر يانا سلێمانيێ دا ئه‌وا پشكدار د خولا نايابا عيراقێ دا سه‌پاندى، ده‌سته‌يا كارگێرى يا يانێ راگه‌هاند كو هه‌كه ژ سزايێ خوه لێڤه‌نه‌بيت دێ خوه ژ خولا ناياب ڤه‌كێشين.
ئێكه‌تيا فوتبۆلا عيراقێ ئه‌ڤرۆ د كۆمبوونا خوه يا ب له‌ز دا كو ل دۆر كاودانێن ناڤ ياريگه‌هێن وه‌رزشى يێن عيراقى هاتبوو به‌ستن، بڕيارا هه‌ژمارتنا ئه‌نجامێ ياريا سلێمانى و نه‌فت ژ سه‌ركه‌فتنا سلێمانيێ ب دو گۆلان به‌رامبه‌ر گۆله‌كێ گوهاڕتبوو بۆ خوساره‌تيێ ب سێ گۆلان به‌رامبه‌ر چنه و ژ لايه‌كێ دى ڤه ژ لايێ مادى ژى ب 10 مليۆن دينارێن عيراقى ل گه‌ل ئه‌نجام نه‌دانا پێنج ياريان د ناڤ ياريگه‌ها وێ دا سزا دابوو.
د ڤێ ده‌ربارێ دا، ئه‌يۆب عه‌زيز ئه‌ندامێ ده‌سته‌يا كارگێرى يا يانا سلێمانيێ يا وه‌رزشى ب مالپه‌رێ فه‌رمى يێ يانێ راگه‌هاند كو ئه‌وان بڕيار دايه ل رۆژا 28\10\2014 تانێ ل بڕيارا ئێكه‌تيا ناڤه‌ندى يا فوتبۆلێ ل عيراقێ بده‌ن.
ئاشكه‌را ژى كريه كو دێ ياريا خوه يا داهاتى ژى به‌رامبه‌ر شۆرته ئه‌نجام ده‌ن و پاشان چاڤه‌رێ تانێ كه‌ن و گۆت: “هه‌كه ئێكه‌تيێ ئه‌نجامێ ياريێ راستڤه‌نه‌كر و سزايێ ل سه‌ر پشته‌ڤانان رانه‌كر، دێ بڕيارا خوه ڤه‌كێشانێ ژ خولێ ده‌ين و پشتى شۆرته چو ياريێن دى ئه‌نجام ناده‌ين”.