سلێمانیێ خوە ژ خولا عیراقێ ڤەکێشا و ب تیما لاوان دێ پشکداری کوردستانێ بیت
ئەڤرۆ، مللەت جەمال:
کارگێریا یانا سلێمانیێ ب نڤیسارەکا فەرمی خو ڤەکێشانا خوە ژ خولا نایابا عیراقێ پێشکێشی ئێکەتیا تەپا پێی یا عیراقێ کر ژبەر قەیرانا دارایی یا نوکە یانە تێدا دەرباز دبیت و دبێت ل روژێن بھێت بریارێن دژوارتر بھێنە دان.
ل دور ڤی بابەتی بەرپرسێ راگەھاندنا یانا سلێمانیێ بەھمەن غەریب بۆ رۆژناما ئەڤرۆ گوت: پشتی چ لایەنا خوە ل یانێ نەکریە خودان و چ لایەن ئامادە نەبوین ئاریشا مە چارەسەر بکەن کو یانە پێدڤی ملیارەک و ٦٠٠ ملیون دیناران بو چارەسەرکرنا ڤێ قەیرانێ، لەورا ب فەرمی ب نڤیسارەکێ مە خوە ڤەکێشا خوە ژ خولا نایابا عیراقێ راگەھاند و مە داخواز ژ ئێکەتیا تەپا پێی یا عیراقێ کریە ژبەر قەیرانا دارایی و ئێمناھیێ تیما مە ژ خولێ نە ھێتە دابەزاندن.
زێدەتر ناڤبری ئەو چەندە ژی دیارکر کو دوورنینە خوە ژ خولا کوردستانێ ژی ڤەکێشن چونکو ئەو پێدڤی ب ٤٥٠ ملیون دینارانە بو ب رێڤەبرنا کاروبارێن تیمێ ژ ھەڤبەست و مووچێن یاریکەران و یانێ بتنێ ٢٠٠ ملیون ھەنە و ئەڤ چەندە بارگرانیەکا مەزنە بو وان و دیارکر ھەکە خولا کودرستانێ ب دو قوناغ ھاتەکرن دێ ھەر یاریکەرەکی نیڤ ھەڤبەستێ دەنی و ھەکە بتنێ ئێک قوناغ بیت دێ ب تیما لاوان پشکداریێ کەن.
ل دووماھیێ بەھمەنی ھیڤی خواست چەوا پشتەڤانی ل یانێن دھوک و ھەولێر دھێتەکرن ژلایێ کارگێریێن پارێزگەھێن وان ڤە وەسا ل یانا سلێمانیێ ژی بھێتەکرن و دیارکر کو کارگێریا پارێزگەھا سلێمانیێ و ھیچ لایەنەکێ حزبی پشتەڤانی ل وان نەکریە.
