سندۆقا دراڤی پەیامەكا رۆهن دەربارەی ئیراقێ ددەت
سندۆقا نێڤدەولەتییا دراڤی د نووترین راپۆرتا خۆ دا وێنەیەكێ گەشبینانە بۆ ئابۆری ئیراقێ دكێشیت و پێشبینیێ دكەت ل نیڤا دوویێ یا سالا 2026 ێ ئیراق ڤەژاندنەكا بلەز ب خۆ ڤە ببینیت لێ هۆشداریێ ددەتە ئیرانێ ژی كو تێچوویێ شەڕی بۆ سەر ئابۆرێ وێ گەلەك یێ دژوار بوویە.
سندووقا ناڤبری راپۆرتا ئاسۆییا ئابۆرییا جیهانی بەلاڤ كر كو تێدا هاتییە ئابۆرێ جیهانێ د ناڤبەرا دو تەوژمێن بەرۆڤاژی دایە كو شەڕێ ئیرانێ و پەككەفتنا زنجیرەیا دابینكرنێ ژ ئالییەكی و شۆرشا ژێرییا دەستكرد وەك هێزەكا پارێزەرژ ئالیێ دی.
ل گۆرەی وێ راپۆرتێ ئیراق دێ ئێك ژ وان وەلاتان بیت كو ل نیڤا دویێ یا 2026 ێ مەزنترین بازدانا ئابۆری تۆمار دكەت و سندووق پێشبینیێ دكەت گەشەیا ئابۆرییا ئیراقێ بۆ ئەڤ سالە بگەهیتە 8،5% ئەڤە ژی پشتی وێ چەندێ كو ل نیڤا ئێكا سالێ ب ئەگەرێ شەڕێ ئیرانێ و دائێخستنا تەنگئاڤا هورمزێ گەشەیا وێ بۆ دبن 2% هاتبوو خار و هۆكارێن ڤەژاندنا ئیراقێ ژی بۆ دەستپێكرنا هنارتنا پەترۆلێ و بلندبوونا بهایێ وێ دزڤڕیت، لێ سندووق هۆشداریێ ددەتە بەغدا كو ئەڤ ڤەژاندنە یا ناسكە و دڤێت حوكمەت ب لەز چاكسازیێن دارایی بكەت و پشتگرێدانێ ل سەر پەترۆلێ كێم بكەت.
راپۆرتێ باس ل رەوشا دژوار یا ئابۆرێ ئیرانێ دكەت كو ل نیڤا ئێكا 2026ێ ب رێژەیا 5،9% پاشڤەزڤڕییە و ئەڤە مەزنترین داكشانە ل پشتی شەڕێێ ئیراقێ و ئیرانێ ل سالێن هەشتێیان و قەیرانێن سەرەكی یێن ئیرانێ ژی تێكچوونا ژێرخانەیا وزەیێ ب ئەگەرێ هێرشێن ئەسمانی و وراوەستانا هنارتنا پەترۆلێ بۆ چار مەهان و بلندبوونا هەلاوسانێ بۆ سەر 75% نە و هەكە رێككەفتنا ئاشتیێ د مەها هەشت دا بهێتە ئیمزاكرن ئیران دێ شێت ل سالا 2027 ێ گەشەیا 12% تۆمار بكەت.
