سه‌رۆكێ رێكخراوا قاعيده يا تيرۆرستى: من سه‌ره‌دانا ئه‌مريكا كريه
ئه‌ڤرۆنيۆز:
سه‌رۆكێ رێكخراوا قاعيده يا تيرۆرستى رادگه‌هينيت كو وى سه‌ره‌دانا ئه‌مريكا كريه وژئه‌گه‌رێ ترسێ ژ كارمه‌ندێن ده‌زگه‌هێ ڤه‌كۆلينێن فيدرالى يا ئه‌مريكى FBI، نه‌شيايه ل گه‌ل رێبه‌رێ رۆحيێ كۆمه‌لا ئيسلامى ل مسرێ كۆمبيت.
ئه‌يمه‌ن زه‌واهرى سه‌رۆكێ قاعيده دتۆماره‌كا ڤيديۆيى دا كو ل سه‌ر تۆرێن جڤاكى هاتيه به‌لاڤكرن ئاماژێ دده‌ت كو دسه‌ره‌دانا خوه‌دا، بێ كو ده‌مێ وێ ئاشكرا بكه‌ت، بزاڤ كريه عومه‌ر عه‌بدولره‌حمان رێبه‌رێ رۆحيێ كۆمه‌لا ئيسلامى ل مسرێ ببينيت.
ئه‌يمه‌ن زه‌واهرى كو ئێكه ژداخوازكريان ودناڤ ليستا تيرۆرا جيهانى دايه، هه‌روه‌سا راگه‌هاند كو ئه‌و ده‌مه‌كى ل ئه‌مريكا مايه وئه‌ندامێن قاعيده پێ گۆتبوو سه‌ره‌دانا عومه‌ر عه‌بدولره‌حمانى نه‌كه‌ت، چونكى هنده‌ك كه‌سێن ل دووڤ وى نڤێژان دكه‌ن، كارمه‌ندن ل ده‌زگه‌هێ FBI .
ژبه‌ركو عومه‌ر عه‌بدولره‌حمان ب تۆمه‌تا پيلاندانانێ بۆ ته‌قينا تاوه‌رێ بازرگانيێ جيهانى ل مه‌ها شوباتا 1993 هاتيه ده‌سته‌سه‌ركرن، دبيت ئه‌و سه‌ره‌دانا زه‌واهرى به‌رى سالا 1993 بيت.
پشتى كوشتنا ئوسامه بن لادن سه‌رۆكێ به‌رێ يێ قاعيده ل سالا 2011 ل پاكستانێ، ئه‌يمه‌ن زه‌واهرى وه‌كو سه‌رۆكێ وێ رێكخراوا تيرۆرستى هاتيه ده‌ستنيشانكرن.
