سه‌رۆكێ ژۆرا بازرگانيا دهۆكێ: دخوازين ب رێيا دهۆكێ چه‌ندين بريكار بۆ كۆمپانيێن مسرى بهێنه دانان
ئەڤرۆنیۆز، سالار دۆسكی:
ئەیاد حەسەن، سەرۆكێ ژۆرا بازرگانی و پیشەسازیا دهۆكێ بۆ ئەڤرۆ نیۆز راگه‌هاند كو ڤه‌كرنا پيشانگه‌ها به‌رهه‌مێن مسرى پارێزگه‌ها دهۆكێ ڤەدگەریت بۆ پەیوەندیێن مە ل گەل مسرێ و دیسا مە دیت كو یا پێدڤیە چالاكیان بكەین و تایبەت ڤەكرنا پیشانگەهه‌كێ بۆ خەلكێ مە و بازرگانێن مە بهێنە نیاسین بۆ وێ چەندێ خەلكێ مە بزانیت چ ل وەلاتێ مسرێ دهێتە دروستكرن، ئەڤە ئێك ژ وان رێكانە بازرگانێن كوردستانێ ب ساناهی بهێن سەردانا پیشانگەهێ بكەن و بزانن چ هەیە ل ڤی وەلاتی و دیسا ببینە جهەك بۆ بەرهەمێ مسری و ب رێيا پارێزگەها دهۆكێ و چەندین بریكار بهێنەدانان بۆ هەموو عیراقێ و بەر ب باشوور و ناڤەراستا عیراقێ بچیت و بازرگانێن كوردستانێ مفاداربن.
ئەو ژی گۆت: ڤەكرنا پیشانگەهان كارتێكرن ل سەر بزاڤا ئابووری ل پارێزگەها دهۆكێ هەیە و دیسا دەلیڤێن كاری ژی بۆ خەلكێ پەیدا دكەت، ب هیڤی نە دێ گرێبەست هێنە ئیمزاكرن دناڤبەرا كومپانیێن مسرێ و كوردستانێ و كومپانیێن مسرێ د رژدن كارێ بازرگانی ل كوردستانێ بكەن.
گۆت ژى كو ژوورا بازرگانی چەندین پەیوەندیێن بازرگانی ل گەل ژۆرێن بازرگانی ل وەلاتێ مسرێ هەنە و گرێبەست و سەره‌دان ژى هەنە و ئەڤە بەرهەمێ وان پەیوەنديانه.
دهێته زانين ئه‌ڤرۆ چارشه‌مبى 10/10/2018 پيشانگه‌ها به‌رهه‌مێن مسرى ل جهێ پێشانگه‌هان ل ئالۆكا هاته ڤه‌كرن.
