سوارێز دێ ڤەگەریتە یانا خوە یا بەرێ
ئەڤرۆ نیوز:
ھەردو یانێن بەرشەلۆنا و سیلتاڤیگو یێن ئیسپانی کەھشتنە رێککەفتنێ بوو ڤەگوھاستنا یاریزانێ وێ یانا کەتەلونی دەینیس سوارێز .
دەینیس سوارێز ئەوێ ل ڤەگوھاستنێن زڤستانا بوری ب شێوەیێ خواستن پەیوەندی ب یانا ئەرسینال کری و ل گەل وێ یانێ نە یێ سەرکەفتی بوو بتنێ ل یاریێن قوناغا دوێ یێن خۆلا ئنگلتەرا پشکداری د ٤ یاریان دا کری ل دیڤ راپورتێن رۆژنامەڤانی ل کەتەلونیا وەسا دیارکرینە یانا سیلتاڤیگو ھەڤبەستا دینیس سوارێز بوو ماوێ چار سالان ئیمزاکریە پشتی شیای د ھەڤرکیا ب دەستڤە ئینانا ئەوی یاریزانی دا ب سەرکەفتی و چاڤەرێ دھێتەکرن د ڤێ حەفتیێ دا ھەڤبەستا ئەوی ب فەرمی ژلایێ وێ یانێ ڤە بھێتە راگەھاندن.
ھەژی گوتنێ یە دینیس سوارێز یێ ٢٥ سالی دەستپێکا ژیانا خوە یا وەرزشی ل گەل پێگەھشتی و لاوێن یانا سیلتاڤیگو دەستپێکری و ل سالا ٢٠١١ پەیوەندی ب یانا مانچێستەر سیتی کریە و یاری ل تیما لاوان و یا دوێ یا وێ یانا ئنگلیزی کری ، ل سالا ٢٠١٣ ب فەرمی ھەڤبەستا بەرشەلۆنا ئیمزاکری دەستپێکێ یاری ل گەل تیما دوێ یا بەرشەلۆنا کر و ل ھەردو وەرزێن ٢٠١٤-٢٠١٥ و ٢٠١٥-٢٠١٦ یانا بەرشەلۆنا ب شێوەیێ خواستن دا ھەردو یانێن سیڤیلیا و ڤیاریال و پاش ڤەگەریانا یانا بەرشەلۆنا و ل ھەرسێ وەرزێن بوری ل گەل یانا بەرشەلۆنا ٧٨ یاری ئەنجامداینە.
