سوبەهی وەزیرێ دەرڤە یێ ئیرانێ دێ سەرەدانا ھەرێما کوردستانێ کەت
ئەڤرۆ نیۆز، قائید میرۆ:
بڕیارە سوبەهی رۆژا سێ شەمبی محەمەد جەواد زەریف ب سەرەدانەکا فەرمی بگەھیتە ھەرێما کوردستانێ و دگەل سەرۆک بارزانی و بەرپرسێن ھەرێما کوردستانێ کۆمببیت، مامۆستایەکێ زانکۆیێ ژی دبێژیت، سەرەدانا وەزیرێ دەرڤەیێ ئیرانێ گرنگیا خۆ ھەیە بۆ ھەرێما کوردستانێ.
رێبین ئازاد، شارەزایێ پەیوەندیێن نێڤدەولەتی بۆ ئەڤرۆ نیۆز دیارکر” سەرەدانا وەزیرێ دەرڤەیێ کۆمارا ئیسلامیا ئیرانێ بۆ ھەرێما کوردستانێ دڤێ قۆناغێ دا گرنگیا خۆ یا ھەی، چونکەی ھەرێم و ئیران دو وەلاتێن جیرانن و زۆرترین پەیوەندیێن بازرگانی دناڤبەرا ھەر دو وەلاتان دا ھەنە و ل ھەموو جیھانێ ژی وەسایە وەلاتێن جیران بەردەوام پێدڤی ب خورتکرنا پەیوەندیان ھەیە، نەخاسمەکێ وەلاتەکی وەک ئیرانێ ژلایێ ئابووری ڤە گرنگیا تایبەت بۆ ھەرێما کوردستانێ ھەیە.
رێبین ئازاد ئاماژەکر” ھەرێما کوردستانێ ئەڤ سالە دێ پێگەھێ دبلۆماسی زێدەتر بەرەف پێشڤە چیت، چونکە پێشبینی دھێتەکرن پشتی سەرەدانا وەزیرێ دەرڤەیێ ئیرانێ چەندین مەزنە بەرپرسێن جیھانی د ھەردو ھەیڤێن دەستپێکی یێن ئەڤسالەدا سەرەدانا ھەرێما کوردستانێ بکەن.
