سوبەھی دادگەھکرنا ئەندامێن جڤاتا ناحیا ئەلقۆش دێ ھێتە ب رێڤەبرن
ئەڤرۆ نیوز، لەزگین جوقی:
سەرۆکێ جڤاتا ناحیا ئەلقوش بۆ ئەڤرۆ نیوز دیار کر کو رێڤەبەرێ بەرێ یێ ناحیا ئەلقوش ل دادگەھێن عیراقێ سکالا ل سەر جڤاتێ تۆمارکریە و ل رۆژا 6/12/2018 دێ ل بەغدا دادگەھگرنا ئەندامێن جڤاتا ناحیا ناڤھاتی ھێتە رێڤەبرن.
سلێمان حەسەن رەشۆ، سەرۆکێ جڤاتا ناحیا ئەلقوش بۆ ئەڤرۆ نیوز دیار کر کو رێڤەبەرێ بەرێ یێ ناحیا ئەلقوش ب تۆمەتا پێگیرنەکرن ب دەوامێ و بەرتەنگ کرنا پرۆژان ژ کاری ھاتبوو لادان، نوکە وی ل بەغدا ل دادگەھا تێھەلچوونا فەرمانبەران سکالا دژی جڤاتا ئەلقوش تۆمارکریە و گۆت: “ئەم دێ سوبەھی ل دادگەھێ بەرھەڤبین بۆ بەرەڤانیکرنێ ژ خالێن خوە یێن شەرعی و لادانا رێڤەبەرێ بەرێ یێ ناحیا ئەلقوش، چونکی گەلەک جاران وی ل بەغدا دژی جڤاتێ کارکریە، لێ ئەو یێ پێگیر نینە ب دەوامێ، لەوڕا یێ ھاتیە لادان و رێڤەبەرێ بەرێ یێ ناحیێ د سکالا خوە دا گۆتبوو جڤاتا ئەلقوش کاردکەت ئەلقوش بێخیتە سەر ب ھەرێما کوردستانێ ڤە، نوکە ژی یێ رژدە ل سەر سکالا خوە و ئەم دێ ل سەر ڤی کەیسی ل دادگەھێ بەرھەڤ بین”.
ناڤھاتی ئاماژە دا وێ چەندێ کو پشتی رێڤەبەرێ ناحیا ئەلقوش ھاتیە لادان ل دووڤ فەرمانا پارێزگارێ نەینەوا دەرگەھێ خوە بەربژارکرنێ ھاتبوو ڤەکرن و ب پتریا دەنگان (لارا یوسف) شیا پوستێ رێڤەبەرا ناحیا ئەلقۆش وەرگرت و گۆت: “ل ھەیڤا تیرمەھا سالا بۆری رێڤەبەرێ ناحیا ئەلقوش ھاتبوو لادان وی سکالا ل سەر جڤاتا ئەلقۆش تۆمارکربوو و شیا بڕیارێ د بەرژوەندیا خوە دا ب دەستڤەبینت و بڕیار ھاتەدان ئەو ڤەگەڕیتە سەر دەوامێ، لێ پشتی بۆ دەمێ چەند ھەیڤان نەزڤریە دەوامێ جارەکا دی ھاتە لادان و نوکە وی ژی جارەکا دی سکالا تۆمارکریە”.
