سۆتنا سۆزەکا خاپینۆك
ئیحسان حەسەن
ل باژێڕەکی کو تێدا پەیڤ دبنە خەنجەر، وان هەردوان پەیمانەک دابوو ئێک، پەیمانەک کو ب گەرمییا ئاگری هاتبوو مۆرکرن، کورکی ب زمانەکێ کو وەک هنگڤینی یێ شرین بوو، پلانەک دارێژتبوو:
* ل وێ رۆژا تە دبەن ل نێزیک مالا وە، ئەز دێ ئاگری هەلکەم، ئەگەر تە دویکێل دیت بزانە ئەز پێش تە چوومە بەرهەڤییا مرنێ.
وی نەدزانی کو عەشق ل نک کچێ ئایینەکە، نەشانۆگەرییەکا بێ بهایە.
ڕۆژا ڕەش هات، دەمێ دەنگێ دهۆل و زرنایێ ل حەوشێ بلند بووی، وێ د جلکێن خوە یێن سپی یێن بویکینییێ دا، چو ڕێ ل بەر خوە نەدیتن ژ بلی وەفادارییێ، چوو سەر بانی دا بۆ جارا دوماهییێ بەرێ خوە بدەتە وێ سۆزێ، ل نێزیک، لسەر گرەکی دویکێلەکا ڕەش و ستویر بلند بوو، دلێ وێ لێدا، وێ وەسا زانی ئەڤیندارێ وێ یێ د ناڤ وێ دویکێلێ دا دچیتە بەرهەڤییا مرنێ.
بێی دودلی چوو ژۆرا تاری، گاز ب جلکێن خوە یێن سپی دا وەرکر، د وێ چرکەیێ دا، بێهنا گازێ ل نک وێ بێهنا گەهشتنێ بوو، ئاگر بەردا جەستەیێ خوە و بوو پاشکۆیا سۆتنەکا بێ دەنگ، وێ دخواست د گەل وی ببیتە تۆزا سۆتی، بێی کو بزانیت ئەو دویکێل تشتەکێ بێبها بوو.
تراژیدییا مەزن ل سەر وی گری بوو، ل وێرێ، ئەو قارەمانێ درەوین ب ساری راوەستابوو. وی تایرێن کەڤن کۆمکربوون و ئاگر بەردابوویێ، ب تنێ دا ببینیت کا کچ دێ چ کەت! دویکێلا تایرێن لاستیکی، دویکێلەکا گەنی و ڕەش و ژەهراوی بوو، رێک وەک وێ خیانەتا وی د دلێ خوەدا ڤەشارتی، ئەو نە زەلامێ سۆزان بوو، بەلکو ئەکتەرەکێ سار بوو کو دخواست عەشقێ بکەتە تاقیگەها درەوێن خوە.
ئەڤرۆ، کچ ل بن سیبەرا سار یا ئاخێ یە، جەستەیەکێ سۆتی کو بوو قوربانییا باوەرییەکا پاقژ. لێ کوڕک یێ دناڤ جادە و کۆلانان دا پیاسەیان دکەت، جگارەیا خوە دکێشیت و ژیانەکا دی برێڤە دبەت، ئەو نموونەیا قارەمانێ بەرزە یێ درەوین، ئەو کەسێ کو ب پەیڤان قەسران ئاڤا دکەت، لێ ب کارێن خوە گۆڕستانان تژی دکەت.
