سێمێلێ هه‌ڤبه‌ستا سێ یاریزانێن نوو ئیمزاكر
ئه‌ڤرۆ، محه‌مه‌د عه‌لی:
داخویانیه‌كێ دا جێگرێ سه‌رۆكێ یانا سێمێلێ بۆ رۆژناما ئه‌ڤرۆ دیاركر كو بفه‌رمی هه‌ڤبه‌ستا سێ یاریزانێن نوو هاته ئیمزاكر ژبۆ بهێزكرنا رێزێن تیمێ و خوه به‌رهه‌ڤكرن بۆ وه‌رزێ نوو یێ خولا كوردستانێ یا ته‌پاپێ بۆ یانێن پلا دو.
زێده‌تر په‌روه‌ر حسێن گۆت: سه‌ره‌رایی قه‌یرانا دارایی یا یانا سێمێلێ تێدا لێ نه‌چاربووینه سێ یاریزانێن نوو ئیناینه دناڤ رێزێن تیما مه یا ته‌پاپێ دا خوه به‌رهه‌ڤكرن بۆ خولا پلا دو ئه‌وا دێ ل 28ێ ڤێ هه‌یڤێ ده‌ستپێكه‌ن و دیاركر كو هه‌رسێ یاریزانێن نوو ئه‌وژی شیمال خورشید یاریزانێ هێرشبه‌ر و ئازاد محیه‌دین گۆلپارێز و ئه‌حمه‌د حه‌سه‌ن یێ هێلا به‌ره‌ڤانیێ و گۆت: پشتی كادرێ راهێنانێ رازیبوون لسه‌ر ئاستێ وان دیاركری دگه‌ل هه‌رسێ یاریزانان رێكه‌فتینه كو لدووڤ شیانێن كارگێریێ مووچه‌كێ هه‌یڤانه دێ بۆ هێنه ته‌رخانكرن و هه‌ڤبه‌ست دێ هه‌تا دوماهیا خولێ بیت.
ژلایه‌كێ دووڤه ناڤهاتی ئه‌وچه‌نده ژی دیاركر كو دێ بزاڤێ كه‌ن چه‌ند یاریزانێن دی یێن پارێزگه‌هێ و ده‌رڤه‌یی پارێزگه‌هێ ژی ئه‌گه‌ر ده‌ستكه‌فن لسه‌ر تیمێ زێده‌كه‌ن به‌ری بكه‌ڤنه د هه‌ڤركیێن خولێ دا .
لدوماهیێ په‌روه‌ری هیڤی خواست جهێن په‌یوه‌ندیدار و پارێزگه‌ها دهۆكێ خوه ل یانا سێمێلێ بكه‌نه خودان و نه‌هێلین هیڤیێن گه‌نجێن سێمێلێ به‌ره ب نه‌مانێ بچیت.
