سێمێل و گارە سەرکەفتن تۆمارکرن
ئەڤرۆ نيوز، ملله‌ت جه‌مال:
ژ چارچوڤێ یاریێن گەرا چارێ یێن خولا پلە ئێکا ھەرێما کوردستانێ دوھی ھەر دو نوونەرێن پارێزگەھا دھۆکێ یانێن سێمێل و گارە سەرکەفتنێن گرنگ لسەر یانێن شەھیدان و سوران تومارکرن.
ل یاریگەھا خوە تیما تەپا پێی یا یانا گارە د یاریەکا ب زەحمەت دا سەرکەفتنەکا گرنگ لسەر مێڤانا خوە یانا سۆران تومارکر ب دو گولێن پاقژ ، د ھەر دو نیڤێن یاریێ دا یاریەکا پری ھەڤرکی دھاتەکرن و ھەر دو تیما ئاستەکێ باش پێشکێشکر تایبەت یاریکەرێن گارە شیان د زوربەیا دەمێن یاریێ دا کونترولا یاریگەھێ بکەن ، د نیڤا ئێکێ دا ل دەقیقا ٣٦یاریکەرێ گارە ئالان محسن پشتی شیای ب شیانێن خوە یێن تایبەت ژ گولچیێ سۆران ئحمەد نیدوی بوری و گولا پێشکەفتنێ تومارکر و د نیڤا دویێ دا محەمەد ئیسماعیل گولا دویێ و پشت راستیێ ل دەقیقا 74 تومارکر.
لدور ڤێ یاریێ ھاریکارێ راھێنەرێ یانا گارە ئاراز سلێمان بۆ رۆژناما ئەڤرۆ گوت: چەندین رۆژ بو مە کار لسەر نەخشێ ڤێ یاریێ دکر چنکو یاریەکا ب زەحمەت بوو پێدڤی بوو ئەم سەرکەفتباین بو وێ چەندێ بچینە دناڤ ھەڤرکیێ دا سوپاس بو خودێ مەرەما مە بجە ھات.
ژلایەکێ دووڤە نوونەرا دویێ یا دھۆکێ یانا سێمێل سەرکەفتنەکا گرنگ و ژ ھەژی لسەر مێڤانا خوە یانا شەھیدان تومارکر ب سێ گۆلا بەرامبەر گۆلەکێ ، نیڤا ئێکێ یا یاریێ ب وەکھەڤیا ھەر دو تیمان بدووماھیک ھات ب گۆلەکێ لێ دنیڤا دویێ دا یانا سێمێل خوە بھێز نیشان دا و شیان کونترولا یاریگەھێ بکەن ودو گۆلا لدووڤ ئێک توماربکەن و یاریێ ب سەرکەفتنا خوە بدووماھیک بینن.