سێ ساله نه‌خوشخانه‌ك ب دووماهى هاتی و ده‌وام تێدا ناهێته كرن
ئه‌ڤرۆ نیوز ، نه‌وزاد زاده هلۆرى:
دورێن سێ سالایه نه‌خوشخانا 60 ته‌ختى یا بلێ كو ب سیسته‌مه‌كێ سه‌رده‌م هاتیه چێكرن و ب دووماهى هاتیه و هه‌یا نها نه كه‌فتیه د خزمه‌تا وه‌لاتیان دا و پترى 200 كارمه‌ند ژى بۆ هاتینه دامه‌زراندن.
دكتور هه‌وار عه‌بدوللا رێڤه‌به‌رێ نه‌خوشخانا بلێ دیاركركو نه‌خوشخانا نوو یا بلێ سێ ساله ب دووماهى هاتیه و هێشتا نه‌كه‌فتى یه د خزمه‌تا وه‌لاتیان دا و بۆ ئه‌ڤرۆ نیوز گۆت : ( نه‌خوشخانا 60 ته‌ختى یا بلێ لسه‌ر سیسته‌مه‌كێ سه‌رده‌م و جیهانى هاتیه چێكرن و پرانیا پشكێن نه‌شته‌رگه‌رى دگه‌ل ژورێن زاروك بوون و ئافره‌تان تێدا هاتینه چێكرن و چه‌ندین خزمه‌تگوزاریێن دن یێن نوشدارى تێدا هاتینه چێكرن كو نها بتنێ یا مایى بكه‌ڤیته د خزمه‌تى َدا و هه‌موو به‌رهه‌ڤیش هاتینه كرن )
دكتور هه‌وارى زێده‌تر گۆت : ( نها 200 نوشدار و برینپێچ و كارمه‌ند ژ بۆ نه‌خوشخانێ هاتیه دامه‌زراندن و بتنێ یا مایى كو نوشدارێن تایبه‌تمه‌ند ب نه‌شته‌رگه‌ریان ڤه بهێن دابینكرن )
ل دور پرسیاره‌كا ئه‌ڤرۆ نیوز ئه‌رێ بوچى سێ ساله نه‌خوشخانه ب دووماهى هاتى و كار تێدا ناهێته‌كرن ، رێڤه‌به‌رى َنه‌خوشخانا بلێ گۆت : ( ژ به‌ركو نه‌خوشخانا نوو یا بلێ دكه‌ڤیته ده‌ڤه‌ره‌كا چیایى و گوندان و دویرى سه‌نته‌رێ پارێزگه‌ه و باژێرایه نوشدارێن نافخویى ژ به‌ر ژیانا خوه و زارویێن خوه نكارن ل ده‌ڤ مه ده‌وامێ بكه‌ن ژ به‌رڤێ ل گور پلانه‌كا نوو حكومه‌تا هه‌رێما كوردستانێ كار سه‌ر وێ یه‌كى َدكه‌ت كو نوشدارێن تایبه‌تمه‌ند بو مه ژ ده‌رڤه‌یى َهه‌رێمێ په‌یدا بكه‌ت و نها بزاڤ دهێتكرن كو نوشداران ژ ده‌رڤه بو نه‌خوشخانا بلێ دابین بكه‌ین و ل ده‌مه‌كێ نێزیك دى َنه‌خوشخانه كه‌ڤیته د خزمه‌تا وه‌لاتیان دا)
