سەرسنكێ هاڤینگەهەكا گوزاری یە و ناسناڤێ خوە ژ دەستدایە
ئەڤرۆ
بەرپرسێ راگەهاندنا گەشت و گوزارا ئامێدیێ بۆ رۆژناما ئەڤرۆ دیار كر، 90 سالان بەری نوكە سەرسنكێ وەك بنەكوكا هاڤینگەهێن عیراقێ هاتیە نیاسین و ئێكەم جار هاڤینگەهەكا مللی بوو یە كو نوكە دبێژنێ كەرتێ تایبەت، لێ مخابن نوكە ئەو ناسناڤە وەك خوە نەمایە.
حكمەت عابد، بەرپرسێ راگەهاندنا رێڤەبەریا گەشت و گوزارا ئامێدیێ دیار كر، ل دووڤ بەلگە و دیكومێنتان و گوڤارێن عەرەبی و عیراقی سەرسنكێ ئێكەم هاڤینگەه بوویە ل سەر ئاستێ عیراقێ، كو ژبلی عیراقیان گەشتیارێن دەرڤە و وەلاتێن عەرەبی ژی قەست دكرنێ، لێ نوكە ئەو ناسناڤێ خوە ژ دەست دایە و پێدڤیە د ڤی بیاڤی دا پتر كار بهێتە كرن بۆ ڤەگەراندنا ڤی ناسناڤی بۆ هاڤینگەهێ سەرسنكێ.
و ئاشكرا كر، گەشت و گوزارا سەرسنكێ د سێ قوناغا دا دەرباز بوویە: پشتی جادە ل سالا 1931 گەهشتیە دەڤەرێ بۆ ئێكەم جار سەرسنك ل سالا 1933 وەك سەیرانگەه و هاڤینگەهەكا ئەهلی هاتیە نیاسین و ل سالا 1938 تا سالا 1952 وەك هاڤینگەهەكا پادشایی (مەلەكی) زێدەباری هاڤینگەهەكا مللی هاتیە نیساین و ل سالا 1952 تا نوكە وەك هاڤینگەهەكا حكوومی بوویە.
ناڤهاتی خویاكر، ژ بەر هەبوونا كوچكا پاشای و ئوتێلا بەری و مەلەڤانگەها ئولومپیاتا و گوندێ فرەنسی و ئوتێلا ئیتالی و (شلێر) و خارنگەها جاهز (ئیتالی) و چەندین بنگەهێن دی یێن گەشتیاری، سەرسنك تا سالا 1990 ێ ل چەرخێ بوری ژی هاڤینگەها ئێكێ بوویە ل سەر ئاستێ عیراقێ هەموویێ و دووڤ دا هاڤینگەها شەقلاوا دهات.
بەرپرسێ راگەهاندنا گەست و گوزارا ئامێدیێ دیار ژی كر، هەكە رەوشا ئەمنی تا رادەیەكی ل دەڤەرێ ئارام ببیت و ئەڤ پرۆژەیێن د رۆژەڤێ دا ل سنورێ ناوچەداریا سەرسنكی بهێنە بجهئینان وەك چێكرنا تلەفریكێ و گەهاندنا جادەیان بۆ وان جهێن گەشتیاری هەروەسا نووژەنكرنا جه و و گوندێن گەشتیاری یێن سنورێ ناوچەدارییا سەرسنكی، هەروەسا پتر گرنگی ب كەرتێ گەشت و گوزاری بهێتە دبیت جارەكا هاڤینگەها سەرسنكی ناڤێ خوە یێ بەری ڤەگەرینیت و سالانە هەژمارەكا زۆرا گەشتیاران قەست بكەنێ، چونكە ژ هەموو لایەكی ڤە سەرسنك یا گونجایە بۆ گەشت و گوزاری ل وەرزێ زڤستانێ و هاڤینێ ژی دی بیتە جهەكێ گونجایی بۆ گەشتیاران.
و گۆت: نوكە كار د نووژەنكرنا ئوتێلا بەری دا دهێتە كرن و كارێ چێكرنێ بەرڤ داویێ یە و هەروەسا ل ئینشنكێ ژی هند وەبەرهێنەران بەرێ خوەدیێ و نوكە چەند پرۆژێن دی یێن گەشت و گوزاری هاتینە چێكرن و پشتی كارێ چێكرنا ئوتێلا بەری ب داوی بهێت دێ دەست ب چێكرنا مەلەڤانگەها ئولومپیاتا هێتە كرن هەر ل سەنتەرێ ناوچەداریا سەرسنكێ و دیسان چێكرنا تەلەفریكا چیایێ گارەی ژی نوكە د رۆژەڤێ دایە و تەكەز كر، ب داوی هاتنا ڤان پرۆژەیان دێ تا رادەیەكی ڤەژاندنێ دەتە كەرتێ گەشت و گوزاری ل ڤێ دەڤەرێ.
