سەرۆک وەزیرێن فرەنسا: بۆ ژناڤبرنا تیرۆرستان دێ دەست ب شەرەکی بەرفرەهـ کەین
ئەڤرۆ:
سەرۆک وەزیرێ فرەنسا راگەھاند کو ئەو دێ د شەرێ ل دژی تیرۆرێ دا ب رەنگەکی بەرفەرەە جە بگرن و بۆ ژناڤبرنا رێکخستنێن تیرۆرست یێن سەر ب قاعیدە و داعشێ ل ھەموو جیھانێ د ناڤ تێکۆشینێ دا بن و گۆت: “ئەڤرۆ ل عیراقێ و سووریێ گەلێ کورد ل گەل ھەڤپەیمانا نێڤدەولەتی بۆ نرخێ مرۆڤان ل دژی تیرۆرستان شەری دکەن و دڤێت ئەم ھەموو وەلاتێن دیمۆکراسیخواز ب رەنگەکی ئەکتیڤ و ب ھەموو رەنگەکی ھاریکاریا کوردان بکەین”.
مانویل فالس سەرۆک وەزیرێن فرەنسا ل باژێرێ پاریس یێ پایتەختا فرەنسا د بەرنامێ تەلەفزیۆنا پێنج یا وەلاتێ خوە دا بەرسڤێ پرسێن رۆژنامەڤانان دا و دیار کر ئەو قەبوول دکەت کو ھێرشێن تیرۆرستان بۆ سەر کۆڤارا شارلی ئیبدۆ و فرۆشگەھا ل ناڤەندا پاریسێ زیانەکا مەزن دایە وەلاتێ وان و ھەموو جیھانا دیمۆکراسیخواز و گۆت: “ئەڤ ھەردو ھێَرشان جارەکا دی نیشا مە دان کو تیرۆرا کۆمێن سەلەفی و کۆمێن سەر ب قاعیدە و داعشێ بۆ ھەموو جیھانێ جھێ مەترسیێ نە و پێدڤی بوو د دەستپێکا دەرکەڤتنا ڤان کۆمێن تیرۆرستی دا ھەموو جیھانا پێشکەڤتی پێکڤە تێکۆشین ئەنجام دانا، لێ ئەڤرۆ ژی نە درەنگە و ئەم دێ ب ھەموو دەرفەتێن خوە ڤە بۆ ژناڤبرنا تیرۆرێ کار بکەین”.
سەرۆک وەزیرێن فرەنسا ھەروەسا راگەھاند ژی کو نە فرەنسا و نە ژی چو وەلاتەکی پێشکەڤتی تەسلیمێ تیرۆرستان نابیت و ژ ھەر دەمی زێدەتر ئەم خوەدان بریارن بۆ ژناڤبرنا تیرۆرێ و گۆت: “دڤێت ئەم ڤێ یەکێ قەبوول بکەین کو ئەڤرۆ کوردێن عیراقێ و یێن سووریێ “ھەرێما کوردستانا عیراقێ و رۆژئاڤایێ کوردستانێ ل سووریێ” ب رەنگەکی کریاری بەرخوەدانیێ ل دژی تیرۆرستێن قاعیدە و داعشێ دکەن و رومەتا ھەموو جیھانێ دپارێزن و دڤێت ئەم ژی ببینە پشکەک ژ شەرێ ل دژی تیرۆرێ و نە ب تنێ وەک پشتەڤان بەلکو ھێزا ژناڤبرنا تیرۆرێ بن و د رۆژێن بھێت دا ئەم دێ ب رەنگەکی کریاری ل ھەر جھەکی جیھانێ شەرەکی دژوار ل دژی تیرۆرستان راگەھینین و وان ژ ناڤ ببەین”.
ل سەر پرسیارا ئەنجامدەرێن کریارا تیرۆرستی یا ل پاریسێ ژی سەرۆک وەزیرێن فرەنسا راگەھاند کو ئەنجامدەرێن کریارێن تیرۆرستی ئاشکرانە و ھەموو تیرۆرستێن کو د ڤان ھەر دو ھێرشان دا جە گرتینە ھاتینە کوشتن، لێ ئۆپەراسیۆنێن مە ل دژی ئەندام و ئالیگرێن کۆمێن تیرۆرست بەردەوام دکەن و گۆت: “ب راستی ئەم چاڤەرێی ھێرشەکا وەسا نەبووین لێ نھا ئەم بەرھەڤین بۆ ب تەمامی ژ ناڤبرنا تیرۆرستان، ڤەکۆلینێن مە ب ھەموو رەنگەکی بەردەوام دکەن و ئەم دێ ئەنجامێن ئۆپەراسیۆن و لێپرسینان ژ رایا گشتی را ژی ئاشکرا بکەین و ئەز خەلکێ خوە دلنیا دکەم کو ئەم ناھێلین جارەکا دی ھێرشێن وەسا بھێنە ئەنجامدان و بۆ ڤێ یەکێ ژی ھەموو پێرابوونێن پێدڤی ژی ھاتینە وەرگرتن”.
ل ئالیێ دی د بەرنامێ تەلەفزیۆنا پێنج دا رۆژنامەڤانێ رۆژناما لا فیگارۆ ژی ھێرشێن تیرۆرستی شیرۆڤە کر و راگەھاند کو ب رەنگەکی گشتی فرەنسا و ب رەنگەکی تایبەت حوکمەتا فرەنسا ژ ئەنجامدانا کریارێن تیرۆرستی بەرپرسیارن و گۆت: “دەمێ کۆمێن سەر ب قاعیدە و داعشێ ل دژی کوردان ل ھەرێما کوردستانا عیراقێ ھێرشێن دانە دەستپێ کرن وەلاتێن ئورۆپا ھەڤکاریا پێدڤی نەدانە کوردان و وەسا ھزر دکرن کو ئاگر ناگەھیتە ئورۆپایێ، لێ مخابن ب ھێرشا ل دژی کۆڤارا شارلی ئیبدۆ ل پاریسێ ژی ئاشکرا بوو کو تیرۆرست نە ب تنێ ل دژی کوردان بەلکو ل دژی ھەموو جیھانێ مەترسیێ دروست دکەن و ژناڤبرنا ئارامی، پێکڤەژیان و دیمۆکراسیێ ئارمانجا تیرۆرستانە”.
ل ئالیێ دی ئەڤرۆ ل باژێرێ پاریسێ و ل بەردەم کۆڤارا شارلی ئیبدۆ خوەنیشادانەکا دیرۆکی ل دژی تیرۆرێ دھێتە ئەنجامدان و فرانسوا ھۆلاند سەرۆکێ فرەنسا د ڤێ دەربارێ دا راگەھاند کو ئەو ژ گەلێ فرەنسا دخوازیت ب ملیۆنان ل چالاکیا شەرمزارکرنا تیرۆرێ دا ئامادە بن و گۆت: “دڤێت ئەم بۆ تیرۆرستان نیشا بدەین کو ھەموو گەلێن دیمۆکراسیخواز و جیھانا پێشکەڤتی تیرۆرێ شەرمزار دکەت و ئەز سۆزێ ددەمە گەلێ خوە و جیھانا پێشکەڤتی ژ ئەڤرۆ پێڤە بۆ ژناڤبرنا تیرۆرێ ئەم دێ ھەموو دەرفەتێن خوە بکار بینین و دێ شەرەکی مەزن ل دژی تیرۆرستان دەسپێ بکەین”.
