سەرۆک کۆمارێ ئیرانێ: بێی رۆلێ ئیرانێ رۆژھەلاتا ناڤین چو دەمەکێ ئارام نابیت
ئەڤرۆ:
سەرۆک کۆمارێ ئیرانێ حەسەن رۆحانی ب ھەلکەفتا سالڤەگەرا شۆرەشا ئیسلامی یا ئیرانێ ئاخڤتنەک پێشکێش خەلکێ ئیرانێ کر و دیار کر کو نھا دەڤەرا رۆژھەلاتا ناڤین د ناڤ خوینێ دایە و شەرەکی مەزن ل عیراق، سووریێ ھەیە و ھشکباوەرێن ئیسلامی دخوازن ل ژێر ناڤێ ئیسلامێ ئارامیا دەڤەرا مە تێک بدەن، لێ ھێزێن جیھانی ژی تنێ ھزرا بەرژەوەندیێن خوە دکەن و ناخوازن سیستەمەک ل سەر بنەمایێ داخوازیێن خەلکێ ڤێ دەڤەرێ بھێتە ئاڤاکرن. ئەو دبێژن ئەم شەرێ تیرۆرێ دکەین، لێ ب بەلگە ژی ھاتە سەلماندن کو ئەو بخوە ل پشت پەردەیی ھاریکاریا وان تیرۆرستان دکەن.
سەرۆک کۆمارێ ئیرانێ ئەو یەک ژی دیار کر کو ئیران وەلاتەک ب ھێزە ل دەڤەرێ و دڤێت ھەموو ئالی رۆلێ وەلاتێ مە ببینن، ھەکەر ئەم نەباین نھا ل عیراقێ چو دەستھەلاتەکا خەلکێ نەدمان، ل سووریێ ژی وەسا و نھا ئەم ل یەمەنێ ژی ھاریکاریا خەلکێ دکەین دا کو بشێن ل ھەمبەر ھێرشێن تیرۆرستێن قاعیدە وەلاتێ خوە ب پارێزن و گۆت: (ئەمریکا ھەتا دوھی ژی راستیا ئیرانێ قەبوول نەدکر، لێ ئەڤرۆکە بۆ وان ئاشکرا بوویە کو دڤێت ل گەل مە دانوستاندنان بکەن، چونکو ب شەری چو پرسەک چارە نابیت و ئەڤرۆکە چو گەلەک ل جیھانێ قەدەرا خوە رادەستی دەولەتەکا دی ناکەت).
حەسەن رۆحانی ئەو یەک ژی دیار کر ھەکەر وان دڤێت ل رۆژھەلاتا ناڤین ئارامی بنەجە بیت بلا رۆلێ ئیرانێ ببینن و دەستان ژ دژبەریا مە بەردەن، ھەکەر ئەو یەک بھێتە کرن ئیران دێ ب رۆلێ خوە یێ کاریگەر بۆ ئارامیا دەڤەرێ رابیت لێ ھەکر ئەو ل سەر سیاسەتا خوە یا نھا بەردەوام بن چو دەمەکێ دەڤەرا رۆژھەلاتا ناڤین ئارام نابیت.
