سەرەڕای قەیرانا دارایی، بەلاڤكرنا مووچەی ڕاناوەستیت
شیرەتكارێ ئابۆری یێ سەرۆك وەزیرێن ئیراقێ راگەهاند كو سەرەڕای قەیرانا دارایی، بەلاڤكرنا مووچەیێ فەرمانبەران ناڕاوەستیت و حوكمەت دێ هەموو ئامرازێن دارایی بكارئینیت بۆ دابینكرنا شایستەیێن دارایی.
مەزهەر محەمەد سالح، شیرەتكارێ ئابۆری یێ سەرۆك وەزیرێن ئیراقێ، ئاشكرا كر كو نەختینەیا بەردەست و داهاتێن نەپەترۆلی ل گەل رێكخستنا خەرجییان، دێ رۆلەكێ سەرەكی هەبیت د دابینكرنا مووچەی دا.
ناڤهاتی ئاماژە ب وێ چەندێ كر كو كێشەیێن تەنگئاڤا هورمزی و كێمبوونا هنارتنا پەترۆلێ كارتێكرن ل داهاتی كریە، لێ ئیراق هێشتا دشێت پێدڤیێن خۆ یێن بنەڕەتی بجهـ بینیت، ب تایبەت مووچەیێ فەرمانبەران كو ب چو رەنگەكی ناڕاوەستیت.
هەروەسا دیار كر كو بەردەوامبوونا قەیرانا هورمزی وەدكەت ئیراق پشتگرێدانێ ل سەر رێكێن جهگیر بۆ هنارتنا پەترۆلێ زێدە بكەت، وەك هێلا كەركووك- جەیهان و بەرفرەهكرنا تۆڕێن هنارتنێ بەرەڤ باكۆر و رۆژئاڤا، دا كو ئەو داهاتێ ژ ئەگەرێ دائێخستنا رێڕەوێن باشوور ژ دەست چووی، بهێتە قەرەبووكرن.
ل دووماهیێ شیرەتكارێ سەرۆك وەزیرێن ئیراقێ دوپات كر كو مووچە د كارێن بەراهیێ یێن خەرجیێن حوكمەتێ دایە و نوكە یێ مسۆگەرە، و د پاشەڕۆژێ دا دێ كار بۆ زێدەكرنا داهاتی و هەمەجۆركرنا رێكێن هنارتنا پەترۆلێ هێتە كرن دا كو ئارامییا دارایی بهێتە پاراستن.
