سەنتەرێن رەوشەنبیری یێن بووینە جھێ گۆتنا وانێن تایبەت
ئەڤرۆ نیوز:
سەنتەرێ رەوشەنبیری یێ شێلادزێ ل سالا 2005 بۆ خەلکێ ناحیا شێلادزێ ھاتیە دروستکرن ژ پێخەمەت گەھاندنا رەوشەنبیریێ د ناڤا تەخین گەنجان و ھەر لایەکێ دا، لێ د ناڤا ڤی سەنتەری دا ژ لایێ چەند ماموستایێن دەڤەرێ ڤە خۆلێن بھێزکرنێ دھێنە ئامادەکرن و گۆتن، لێ ئەو چەندە بێ بەرامبەر نینە، بەلکو بەرامبەر ھەر خولەکێ کوژمەکێ پارەی ژ ماموستایێن ناڤبری دھێتە وەرگرتن.
ماموستایەکی نەخواستیە ناڤێ خوە ئاشکرا بکەت بۆ ئەڤرۆ گوت: ئەز ھەر سالەکێ خولێن بھێزکرنێ بۆ قوتابیان بەرھەڤ دکەم و ژ نەبوونا جھێ وانەگوتنێ ئەم نەچارین پەنایێ بەر ب سەنتەرێ رەوشەنبیری ڤە ببەین و گوت: ئەم ھیڤیخوازین د ناڤا سەنتەری دا ھەر جۆرە کێماسیەکا ھەبیت بھێتە چارەسەرکرن، دا کو ب ھەر شێوەیەکێ ھەبیت ماموستا دگەل قوتابیان بشێن ژ سەنتەرێ رەوشەنبیری د مفادار بن.
ریڤەبەرێ سەنتەرێ رەوشەنبیری یێ شێلادزێ بۆ ئەڤرۆ گۆت: ئەڤ سەنتەرە ل رێکەفتی 17/2/2005 بوویە و ب ھەمان سەنتەر ئەم شیاینە چەندین کار و چالاکیان ژ بۆ دەڤەرێ پێشکێش بکەین، ژ وان ژی ھژمارەکا سیمینار و ورک شوپ و کونفراس و چەندین چالاکیێن ھونەری مینا فوتوگرافی و پێشکێشکرنا پەرتوکان و چەند خولێن جودا جودا و چەندین خولێن درواری بۆ ئافرەتێن دەڤەرێ ھاتینە بەرھەڤکرن.
رێبەر حسێن ریڤەبەرێ سەنتەرێ رەوشەنبیری یێ شێلادزێ گۆت: ژ بەر کو چەندین ماموستایێن دەڤەرا مە خۆلێن بھێزکرنێ بۆ قوتابیان بەرھەڤدکەن و وەک جھێ دەستنیشانکری وان ماموستایان چو جھـ نینن، لەورا ناچار دبن پەنایێ بەر ب سەنتەرێ رەوشەنبیری یێ شێلادزێ دبەن.
رێڤەبەرێ سەنتەری دبێژیت ژی کو: نھا چار خولێن وانەگوتنێ دناڤا سەنتەرێ شێلادزێ دا دھێنە گۆتن و ھەر خولەک بۆ ماوێ ھەیڤەکێ یە و بەرامبەر ڤێ ھەیڤێ مە وەک رێڤەبەریا سەنتەرێ رەوشەنبیری شێلادزێ بۆ ھەر خولەکێ ب رێژا 10% پارە ژ ماموستایان وەرگرتیە و ئەڤ پارەیە دچیتە سەر ھژمارا کارگێریا سەنتەری، چونکو ب ھەمان پارە ئەم وەک سەنتەر پشتی خۆل ب دووماھی دھێن رادبین ب پاقژکرنا سەنتەری و نەھێلانا ھەر کێماسیەکێ و دابینکرنا ھەر پێدڤیەکا سەنتەرێ ناڤبری پێدڤی پێ ھەبیت.
رێڤەبەرێ سەنتەرێ رەوشەنبیری یێ شێلادزی گۆت ژی: فەرە ھەر ماموستایەکێ خولەکا بھێزکرنێ ل سەنتەرەکێ پێشکێش بکەت پارە ژ وی ماموستای بھێتە وەرگرتن، چونکە ماموستا کورێ حوکمەتێ یە و خودان مۆچێ ھەیڤانەیە و زێدەباری وێ چەندێ د ھەر خولەکێ ژی کۆژمەکێ دیارکری ژ قوتابیان وەردگریت، لێ فەرە ھزر د وێ چەندێ دا بھێـتەکرن پارە ژ قوتابیان نەھێنە وەرگرتن، چونکە گەلەک قوتابی ھەنە د دەستکورتن و د شیانێن وان دا نینە قەستا خولین دیارکری بکەن.
ل دووماھیێ رێڤەبەرێ سەنتەری نەڤەشارت: جھێن شولەژێ یا ھایداری ڤێ چەندێ یە کو ئەم پارەی ژ ماموستایێن خودان خولان وەردگرین، چونکە ئەو پارە دچیتە ل سەر ھژمارا سەنتەری و د لیستا دارایی دا ئاماژە پێ دھێتە دان.
رۆژنامەڤان برقی رێکانی خەلکێ ناحیا شێلادزێ یە بۆ ئەڤرۆ گۆت: سەنتەرێن رەوشەنبیری وەک جھێ گەنجان ھاتینە دەستنیشانکرن، لێ نھا ئەو سەنتەر بووینە جھێ وەرگرتنا پارەی، لەورا وەک رۆژنامەڤانەکێ دەڤەرێ دبینم ئەگەر ئەو سەنتەرە نەشێن وەک پێدڤی خزمەتا گەنجان بکەن، بلا پارەی ژی ژ ماموستا و قوتابیێن دەڤەرێ وەرنەگریت، چونکە سەنتەر دھێنە دروستکرن ژ پێخەمەت کرنا خزمەتێ و پێشئێخستنا رەوشەنبیریێ دناڤا خەلکی دا و شیانێن گەنجان پێشیئێخیت، لەورا فەرە حوکمەت پارەی بۆ سەنتەران دابین بکەن نەک ئەو ماموستایێن خولین بھێزکرنێ بۆ قوتابیان ئامادە دکەن.
رزگار نێروەی سەرۆکێ لیژنا رەوشەنبیری و لاوان ل جڤاتا پارێزگەھا دھۆکێ ل دور ڤێ چەندێ دیار کر، ژ بەر کو د ھەر سالەکێ دا چەند خولەکێن بھێزکرنێ بۆ قوتابیان دھێنە ئامادەکرن، لەورا ئەڤ سالە ژی خولێن بھێزکرنێ ھاتینە ڤەکرن و ماموستایێن ناحیا شێلادزێ ژی ئەو خول بەرھەڤ کریە، لێ نەبونا جھێ گۆتنا خولێ بوویە ئەگەر پەنایێ بۆ سەنتەرێن رەوشەنبیری بریە و گوت: رێڤەبەریا سەنتەرێ رەوشەنبیری ب رێژا 10% پارە ژ ماموستایێن خولێ وەرگرتیە، لێ ئەو وەرگرتنە ب تنێ بۆ سەخبێرکرنا سەنتەری یە، چونکە ھەر سەنتەرەکێ پێدڤی یا ب سەخبێریێ ھەی، لەورا ب کۆژمەکێ کێم وان سەنتەران پارە وەرگرتینە و ب تنێ بو سەخبێریێ یە و نە زێدەتر، دا کو ھەر دەمێ خۆلا وان ماموستایان ب داوی دھێن ئەو سەنتەرە جارەکا دی وەک بەرێ ب شێوەیەکێ باش و رێک و پێک بھێنە پاقژکرن.