شانده‌كێ په‌رله‌مانێ كوردستانێ دێ سه‌ره‌دانا به‌غدا كه‌ت
ئه‌ڤرۆ نیوز ، زنار تۆڤى:
بریاره ل حه‌فتیا بهێت شانده‌كێ په‌رله‌مانێ كوردستانێ سه‌ره‌دانا به‌غدا بكه‌ت و ل گه‌ل هه‌رسێ سه‌رۆكاتیێن عیراقى كۆمبوونان ئه‌نجام دبه‌ت و گوتۆبێژان ل سه‌ر وان هه‌موو كێشان بكه‌ن، یێن كو هه‌تا نوكه دناڤبه‌را هه‌ولێر و به‌غدا دا نه‌هاتینه چاره‌سه‌ر كرن.
محسن دۆسكى، ئه‌ندامێ په‌رله‌مانێ كوردستانێ ل سه‌ر فراكسیۆنا پارتى دیموكراتى كوردستان، بۆ ئه‌ڤرۆ نیوز دیار كر: ب مه‌ره‌ما پشته‌ڤانیا وى شاندێ حوكمه‌تا هه‌رێما كوردستانێ یێ كو به‌رى نوكه سه‌ره‌دانا به‌غدا كرى، دێ شاندێ په‌رله‌مانێ كوردستانێ سه‌ره‌دانا به‌غدا كه‌ت، داكو رێككه‌فتن بهێته كرن و پشكا هه‌رێما كوردستانێ د پرۆژه قانوونا بودجێ سالا 2021 یێ عیراقێ بهێته جهگیر كرن.
ناڤهاتى گۆت ژى: ل حه‌فتیا بهێت سه‌رۆكا په‌رله‌مانێ كوردستانێ و سه‌رۆكێن فراكسیۆنان ل په‌رله‌مانێ كوردستانێ دێ سه‌ره‌دانا به‌غدا كه‌ن و دێ ل گه‌ل په‌رله‌مانێ عیراقێ و سه‌رۆك وه‌زیرێن عیراقێ و سه‌رۆك كۆمارى كۆم بن، چوونا ڤى شاندى بۆ هندێ یه، كو ل حه‌فتیا بورى شانده‌كێ حوكمه‌تا هه‌رێمێ سه‌ره‌دانا به‌غدا كربوو، ده‌رباره‌ى بودجێ سالا 2021 گه‌هشتبوونه رێككه‌فتنا ده‌ستپێكى.
