شه‌شه‌مین فلمه فیستیڤالا دهۆك یا نێڤده‌وله‌تى دێ ب فلمێ زاگرۆس هێته ڤه‌كرن
ئه‌ڤرۆ نیوز ، زنار تۆڤى:
ئەڤرۆ ئێكشه‌مبى 23/9/2018 كونفرانسێ راگه‌هاندنا ئه‌نجامدانا گه‌را شه‌شێ یا فلمه فیستیڤالا دهۆك یا نێڤده‌وله‌تى ل هۆلا پانۆراما ئازادى هاته گێران و تێدا هه‌موو هووركاریێن وێ فیستیڤالێ هاتنه دیاركرن و كو د ئه‌ڤ ساله ژى دا پارێزگارێ دهۆكێ فه‌رهاد ئه‌ترووشى دێ رێڤه‌به‌رێ فلمه فیستیڤالا دهۆكێ بیت، دیسا ژ ئه‌گه‌رێ هه‌لبژارتنان فیستیڤال هاتیه پاشخستن بۆ هه‌یڤا چریا ئێكێ، داكو ئه‌و مفاى ژ راگه‌هاندنێ ببین و ئه‌ڤ ساله فلمه فیستیڤالا دهۆكێ دێ ل 20_27/ 10/ 2018 ل هۆلا كونگران هێته گێران.
شه‌مال ئێك ژ سه‌رپه‌رشتیارێن فیستیڤالێ بۆ رۆژناما ئه‌ڤرۆ دیاركر: كو فلمێن سینه‌مایى یێن كوردى سال بۆ سالێ یێ كێمتر لێ دهێن، لێ ئه‌ڤ ساله فلمێ ڤه‌كرنا فیستیڤالێ دێ فلمێ سینه‌مایى زاگرۆس یێ ده‌رهێنه‌رێ كورد سه‌هیم عومه‌ر خه‌لیفه بیت.
هه‌روه‌سا محه‌مه‌د ئه‌كتاش ئێك ژ سه‌رپه‌رشتیارێن فیستیڤالێ دیاركر: ئه‌ڤ ساله فیستیڤالا دهۆكێ بۆ ئه‌نداما ئێكه‌تیا ره‌خنه‌گرێن جیهانى و دێ ئه‌ڤ خه‌لاته ژى ئه‌ڤ ساله هێته‌دان، ئه‌ڤ ساله نێزیكى هزار فلمان بۆ فیستیڤالێ هاتینه و دیسا گه‌له‌ك فلمێن باش بۆ فیستیڤالێ هاتینه، كو چه‌ندین خه‌لاتێن جیهانى وه‌رگرتینه، هه‌روه‌سا ئه‌ڤ ساله وه‌لاتێ مێهڤان بۆ فلمه فیستیڤالێ وه‌لاتێ ئه‌رمینیا یه، دیسا فیستیڤالێ فوكسه‌ك بۆ سه‌ر ژنێن جیهانى و ژنێن كورد هه‌یه.
شه‌وكه‌ت ئه‌مین كوركى رێڤه‌به‌رێ هونه‌رى یێ فیستیڤالێ گۆت: ئه‌ڤ ساله ئه‌م دێ گرنگیێ ب وركشۆپ و سمیناران ده‌ین و مه به‌رنامه‌ك باش بۆ ڤێ چه‌ندێ د گه‌له‌ك واران دا دانایه و خه‌لاتێ ره‌خنه‌گرێ نێڤده‌وله‌تى دێ هێته‌دان و من ژى ئه‌ڤ خه‌لاته وه‌رگرتیه و هه‌روه‌سا 74 وه‌لاتان پشكدارى دڤى فیستیڤالێ دا كریه و دیسا 120 فلمێن كوردى ژى دێ پشكداریێ تێدا كه‌ن.
