شۆڕشا ئیلۆنێ ئیرادهیا گهلهكێ بێ دهولهت، نه بهس بیرهوهریهك
عزهت یوسف
شۆڕشا ئیلۆنێ باوهری و گهشبینی و خهبات و ئیرادهیا گهلهكێ ستهملێكری و بێ ماف و دهولهت ژ بۆ ب دهستڤهئینا مافێن رهوایێن گهلێ كوردستانێ.
نهتهوه د درێژاهییا دیرۆكێ دا د كاودان و قووناغێن جودا و تهحهددا دا دهرباز دبن، لێ گهلێن زیندی و ساخلهم بهرگهیێ ئهڤان كاودانێن سهخت دگرن و رادهستی قهدهرێ نابن و ناكهڤن، وهسا شۆڕشا ئیلۆنا مهزن كهته د قادا خهباتێ و زنجیرهیێن دژوارێن ئاستهنگ و مهحالان قهتاندن و رۆلهكێ دیرۆكی ژ ئیراده و خهباتێ تۆمار كر. دیسا شۆڕشا ئیلۆنێ رابۆرهك نینه بۆ بیرلێكرنێ، بهلكو نهخشهیێ ئاییندهكی كێشایه رێبازهكا تژی شانازی بوو.
راسته شۆڕش دكهڤن، لێ نامرن، دوهییا شۆڕشا ئیلونێ، شۆڕشا گولانێ دامهزراند، سهرهلدان بهرههمئینا، ئهڤرۆیا ههرێما كوردستانێ ئاڤا كر و سوباهییا دهولهتبوونێ دخوازیت. وهسا شۆڕشا ئیلۆنێ بنیاتهكێ كۆنكریتی یێ خهباتێ بوو، چونكی ل سهر ئایدیۆلیژیهكا موكوم و هاتبوو دامهزراندن و خۆدان سهركردهكێ قارهمان و پشتگهرمێ پێشمهرگه و جانفیدایێن گهلێ كوردستانێ بوو.
د شۆڕشا ئیلۆنێ دا، جوگرافیهكا دیار و بهرتهنگ كری ژ بۆ خهباتێ نهبوو، توخیب دهرباز كربوون. شۆڕش یا ههمیان و سهرانسهری بوو؛ دا بینی لاوێن شنگالێ ل پشت گهلیێ دهۆكێ د سهنگهران دا بوون (بۆ نموونه 7 پێشمهرگه ژ پێكهاتا ئیزدی یێن خهلكی شنگالێ ژماره دۆشك ل بارهگایێ گوندێ بادێ بوون)، كوڕێن دهۆكێ ل چیایێ سهرتیزی شههید بوون، خهلكێ كهركووكێ بهرگری ل زۆزكی و هندرینی دكر (بۆ ئاماژهپێدان، 18 پێشمهرگهیێن خهلكێ كهركووكێ، ههر وهكی د پهرتووكا نڤیسهرهكێ سویدی دا هاتی د هێرشهكا ئاسمانی یا دوژمنی دا ل دهڤهرا بالهكایهتی شههید بوون)، پێشمهرگهیێن زاخۆ ل دهربهندیخان بوون، كوردێن باكور و رۆژههلات و رۆژئاڤا د قادا بهرخۆدان و شهڕێ مان و نهمانێ دا بوون (بۆ ناڤئینان، لوین كو خهلكی رۆژئاڤا بوو ل گهل شههید هومز مهلك چكو ل پشتا چیایێ زاوا پێكڤه شههید بوون).. ئانكو شۆڕشهكا نهتهوهسازی بوو.
بهرپرسیارهتییا مه یا ئهڤرۆ، نه بهس ڤهگهڕیانهكا بۆ دیرۆكێ و پاراستنا دیرۆكا شۆڕشا ئیلۆنێ یه، بهلكو نیشادانهكه ژ بۆ پاراستنا دهستكهفتێن نهایێ گهلێ كوردستانێ یه، كو ژ ڤهرێژا خهباتا شۆڕشا ئیلۆنێ و گولانێ و سهرهلدانێ یه، ژ قوربانیدانا گهلێ كوردستانێ و خوینا پێشمهگهیێ قارهمانه، ژ ئازایهتی و قارهمانییا سهركێشێ كاروانێ مهزن مستهفا بارزانی یه.
د ڤێ یادا شكۆدار دا، نهمری و سهروهری بۆ شههیدێن كوردستانی و سهركاروانێ نهمران پیشهنگ و پێشهوایێ گهلێ كوردستانێ بارزانیێ نهمر.
