شیرەتکارەکێ پەرلەمانی: دەستھەلاتا دستووری ل ھەرێمێ نینە سکالایا نەوەی نوێ برێڤەببەت
ئەڤرۆ، ئەمیر ئەترووشی:
شیرەتکارەکێ قانوونی یێ پەرلەمانێ کوردستانێ راگەھاند کو سکالایا نەوەی نوێ ژ لایێ قانوونی ڤە یا دروست نینە، چونکو دادگەھا کارگێری چو دەستھەلات نینن ڤان جۆرە سکالایان برێڤەببەت، بەلکو ئەڤە دەستھەلاتا دادگەھا دستووری یە و بێگومان ژی ل ھەرێما کوردستانێ دادگەھا دەستووری نینە و گۆت: “مە وەکو ھەرێما کوردستانێ دەستوور ژی نینە، لەوما پێدڤی بوو ئەڤ سکالایە بۆ دادگەھا عیراقێ یا فیدرال ھاتبایە بلندکرن”.
د. وەعدی مزووری، شیرەتکارێ قانوونی یێ پەرلەمانێ کوردستانێ بۆ ئەڤرۆ نیوز ئاشکرا ژی کر کو د ڤێ سکالایێ دا ھاتیە کو ماددا 50 ژ دستوورێ عیراقێ رێ نادەت روونشتنا ئێکێ یا ڤەکری بمینیت، بەلێ ڤی ماددەی چو پەیوەندی ب پەرلەمانێ کوردستانێ ڤە نینە، بەلکو بەحسێ جڤاتا نوونەرێن عیراقێ یە و سکالا بەحسێ ھندێ کریە کو ھێلانا روونشتنا ئێکێ یا ڤەکری ھەڤدژە ل گەل مادێ 14 ژ پەیرەوێ ناڤخۆ یێ پەرلەمانێ کوردستانێ و ژبلی ڤی ماددەی بەحسێ ڤێ چەندێ نەکریە و گۆت: ” سکالا ژ ھەموو لایان ڤە یا قانوونی نینە و دڤێت بھێتە رەتکرن”.
ژ ئالیێ خوە ڤە رێڤینک ھروری، سەرۆکێ بەروەخت یێ پەرلەمانێ کوردستانێ بەری نھا بۆ ئەڤرۆ نیوز راگەھاند بوو، ل سەر سکالایەکا نەوەی نوێ، ئەو یێ ھاتیە داخوازکرن بۆ دادگەھێ و بێ دو دلی دێ چیتە بەرامبەر دادگەھێ و وەکو ئەندام پەرلەمانەک دێ ئەرکێ خوە بجھئینیت.
ناڤھاتی خویا کربوو کو ل وی دەمی نەوەی نوێ سکالا تۆمارکر و گۆتن ئەڤە نە دادیە و نە قانوونی یە و نە دیموکراتیە و سکالا ل دادگەھێ ل سەر من وەکو سەرۆکێ بەروەخت یێ پەرلەمانی تومارکریە و گۆت: “دادگەھێ ژی ئەز ئاگەھدارکریمە ل سەر سکالایێ و من ژی بەرھەڤبوونا خوە دیارکریە کو ل رۆژا 18/12/2018 ل دەمژمێر 11 ی سپێدێ ل بەرامبەر دادگەھێ ئامادەبم، بەلێ راوێژکارێ قانوونی یێ پەرلەمانی ڤێ سکالایێ ب نە قانوونی ل قەلەم ددەت”.
