شەڤانە ل سەر ئاستێ کوردستانێ یاریێن فلکلۆرێ ل ئاکرێ دھێنە ئەنجامدان
ئەڤرۆ نیوز، رەمەزان ھەرنی:
سالانە وەکو نەریتەک ل شەڤێن رەمەزانێ ل ئاکرێ یاریێن فلکلۆری دھێنە ئەنجامدان و ئەڤ جورە یاریە بووینە ئەگەر کو ئەڤ سالە خەلک ل سەر ئاستێ کوردستانێ شەڤانە ل ئاکرێ پشکداریی د ساخکرن و ئەنجامدانا یاریێن فلکلوری دا بکەن.
عەدنان عەبدولوەھاب، بەرپرسێ گرۆپێ پێشمەرگە و رێکخەرێ یاریێن فلکلۆری ل ئاکرێ بۆ ئەڤرۆ نیوز دیار کر کو وەکو گرۆپێ پێشمەرگە سالانە ل ھەیڤا رەمەزانێ خولا گوستیل ڤەشارتنێ ل شەڤێن رەمەزانێ ل ئاکرێ ئەنجام ددەن ، ب مەرەما پاراستنا یاریێن فلکلۆری داکو نەھێنە ژ بیرکرن و گۆت: “ئەنجامدانا ڤان جۆرە یاریان د ھەیڤا رەمەزانا پیرۆز دا تایبەتمەندیا خوە ھەیە”.
ناڤھاتی ئاماژە دا وێ چەندێ کو چەندین سالە ل سەر ئێک خولا گوستیل ڤەشارتنێ ل ئاکرێ ئەنجام ددەن و ئەڤ سالە ل سەر ئاستێ کوردستانێ پشکداری ڤێ خولێ بووینە و شەڤانە ل ئاکرێ دھێتە ئەنجامدان و گۆت: “تیمێن پشکدار یاریا خوە دکەن ل دووماھیێ ژی دیاری و خەلات ل سەر تیمێن سەرکەفتی دھێنە بەلاڤکرن”.
