شەکر ژی فشارا خوینێ بلند دکەت
ئەڤرۆ، بەرپەرێ ساخلەمیێ:
ھەکە مرۆڤ خوێ زێدە بخوت دێ فشارا خوینێ بلند بیت و گەھیتە ئاستێن ب مەترسی و گەلەک خوارنا شەکرێ و شریناھیان ژی رەنگە کارتێکرنەکا وەکی وێ پەیدابکەت.
ھەموو کەس دزانن کو گەلەک خوارنا خوێ شیان ھەنە فشارا خوینێ بلندبکەت، بەلێ ڤەکولینەکا نوو کو ژلایێ چەند نوشداران ھاتیە ئەنجامدان دیاردکەت کو گەلەک خوارنا شرینی و شەکرێ ژی وەکو کارتێکرنا خوێ ل لەشێ مرۆڤی پەیدابکەت، ئەڤ چەندەژی بەرێخودانا خەلکی بۆ نەخۆشیا فشارا خوینێ دگوھۆریت ئەوا کو ژیانا ملیونان مرۆڤان دئێخیتە د ئالوزیێ دا.
ڤەکولین ئیشارەت ب وێ چەندێ ددەت کو خوارنا خوارنێن پێکھاتی ژ شەکرا ( فروکتوز) ئەوا گەلەک دناڤ فێقی دا ھەی، یان رۆژانە ڤەخوارنا دو قودیکێن ڤەخوارنێن غازی دبیتە ئەگەرێ بلندبوونا رێژا فشارا خوینێ ب رێژا ٣٠% و ھەتا ھەکە مرۆڤ پارێزێ ژی ژ خوێ بکەت.
د. مایکل شونشەل ئێک ژ نوشدارێن مەزن کو ڤەکولین ئەنجام دای و تایبەتمەندێ فشارا خوینێ ل سەنتەرێ پزیشکیێ سەر ب زانکویا کولورادو دیاردکەت کو ئاریشە ئەوە فروکتوز دناڤ گەلەک خوارنان دا ھەیە و ئەنجامێن ڤەکولینێ ھاتینە پشتی کو سێرڤەیەک ل سەر ٤٥٠٠ مرۆڤان ل نەتەوێن ئێکگرتی ھاتیە کرن کو ھەموو د ساخلەم بوون و چ فشارا خوینێ نەبوو، و ئەڤ کەسە بۆ دەمێ چار سالان کەتنە ل ژێر ڤەکولینان.
ل دووڤ ڤەکولینێ دیاردبیت کو ھەر کەسەکی پێگەھشتی رۆژانە ٦٤ گرامێن فرکتوزی دخۆت، ئانکو ھندی شەکرا دناڤ دو قودیکێن ێودایێ دا ھەین، بەلێ خوارنا گەلەک شەکرێ مرۆڤی بەرئاتافی بلندبوونا فشارا خوینێ دکەت ب رێژا ٣٠% کو دگەھیتە ٩/١٤ و یا دروست پێدڤیە ٨/١٢ بیت.
ژلایێ خۆڤە ( شاریل لافەر) تایبەتمەندا نەخۆشیێن ھناڤان ل سەنتەرێ زانکویا ئێم ئەی گومان ب ئەنجامێن ڤەکولینێ ھەبوو و ئیشارەت ب وێ چەندێ دا کو ئەو ڤەکولین ئەگەرێن فزیولوژی یێن پشتەڤانیا شەکرێ دکەن کو دبیتە ئەگەرێ بلندبوونا فشارا خوینێ شروڤە ناکەن، و گوت: رەنگە پوختەیێ ڤەکولینێ ب شێوازەکێ بەروڤاژی ھاتبیتە بەرچاڤکرن، و تووشبویێن بلندبوونا فشارا خوینێ گەلەک حەز ژ خوارنا شەکرێ دکەن، ژبەرکو ژ خوارنا خوێ بێ بەھر دبن و ددووڤدا ئەو گەلەک حەز ژ خوارنا فرکتوزی دکەن، و دبێژیت کو شەکرێ چ پەیوەندی ب فشارا خوینێ ڤە نینە.
کومپانیا (کورن ریفاینرز) ئێک ژ کومپانیێن مەزنە د وارێ چێکرنا خوارنێن پری فرکتوز دا ب دژواری ل ھەمبەر ڤێ ڤەکولینێ راوەستیا و بەیاننامەک بەلاڤکر و تێدا دیارکر کو ئەڤ ڤەکولینە ب ھووربینی نەھاتیە ئەنجام دان و سروشتێ خوارنێ ب دروستی تێدا نەھاتیە تومارکرن، ھەروەسان گوت: ھەبوونا ٧٤ گرامێن فرکتوزی دناڤ دو قودیکێن ێودایێ دا مارەکا ئاشوپی یە چ راستی بۆ نینە، بەلێ د. شونشەلی بەرگری ژ ڤەکولینێ کر و گوت: ڤەکولینەکا وەکی ڤێ ڤەکولینێ ل سەرێ سالێ ل سەر مشکان ھاتبوو کرن و دیارببو کو پشتی شەکر ژ مشکان ھاتیە قەدەغەکرن فشارا وان خوینێ کێم ببوو.
