عەرەب ل سەرێکانیێ رێ نادەن کورد ڤەگەڕنە مالێن خوە
ب هزاران وەلاتیێن کورد یێن خەلکێ سەرێکانیێ دەست ب خوەنیشادانەکا مەزن کرن و داخواز ژ شامێ و رێڤەبەریا خوەسەر کرن کو هاریکاریا وان بکەن دا ڤەگەرنە ڤە مالێن خوە، چونکی نها رەوشا وان ل کەمپان گەلەک خرابە.
ب هزاران وەلاتیێن کورد یێن خەلکێ سەرێکانیێ کو بەری حەفت سالان ژ بەر ئێرشێن تورکیا و گرۆپێن چەکدار نەچار مابوون بەرێ خوە بدەنە حەسەکێ و دەڤەرێن دی نها داخواز دکەن کو شام و پارێزگارێ حەسەکێ هاریکاریا وان بکەن دا ئەو بشێن ڤەگەرنە ڤە مالێن خوە.
وەلاتیەکێ سەرێکانیێ یێ ب ناڤێ حەسەن دیار کر، نها رەوشا وان ل کەمپان گەلەک خرابە و وەکو پێدڤی هاریکاریا وان ناهێتە کرن، خوارن کێمە و ئاڤ ژی وەکو پێدڤی بەردەستێ وان نینە، بەرپرسێن حەسەکێ خەمساریێ دکەن و وەکو پێدڤی هاریکاریا وان ناهێتە کرن، نها ب هزاران وەلاتیێن عەفرینێ چووینە مالێن خوە و دڤێت ئاسانکاری بۆ وان بهێتە کرن دا ئەو ژی بشێن ڤەگەرنە ڤە مالێن خوە.
نورەدین عیسا پارێزگارێ حەسەکێ چوو ناڤ خوەنیشادەران و گەل وان ئاخڤی و دیار کر، وەکو پارێزگارێ حەسەکێ و رێڤەبەریا خوەسەر دەمەکە ئەو ل گەل شامێ دانوستاندنان دکەن و بەرپرسێن شامێ ژی سۆز داینە یا پێدڤی بهێتە کرن دا خەلکێ سەرێکانیێ بشێن ڤەگەرنە ڤە مالێن خوە، وەکو رێڤەبەریا خوەسەر ژی یا د شیان دا بیت دێ بۆ خەلکێ سەرێکانیێ هێتە کرن.
ل ئالیێ دی هژمارەک زێدە ژ خوەنیشادەران دیار کرن عەرەبێن کو ب زۆرێ ل مالێن وان هاتینە بجهکرن نها ل هەمبەر چۆلکرنا مالێن کوردان داخوازا پارەیەکێ مەزن دکەن و ئەو ژی نەشێن چو پارەیان بدەن و دڤێت حوکمەتا شامێ و رێڤەبەریا خوەسەر ئاریشەیا وان عەرەبان چارەسەر بکەت.
ئەو یەک د دەمەکێ دایە کو بەری نها ناڤەندا چاڤدێریا مافێن مرۆڤی یا سووریێ ژی دیار کربوو، گرۆپێن چەکدار یێن کو تورکیا پشتەڤانیێ ل وان دکەت د رەوشا نها دا ناخوازن مالێن کوردان چۆل بکەن و هەروەسا هەتا نها شامێ ژی نەشیایە فشارەکا مەزن ل وان گرۆپان بکەت دا مالێن کوردان چۆل بکەن و ژ بەر ڤێ یەکێ ژی هەتا نها کوردێن سەرێکانیێ نەشیاینە ڤەگەرنە ڤە مالێن خوە و دڤێت بۆ ڤەگەرا کوردان کارەک باش بهێتە کرن.
چالاکڤانێن کورد ل رۆژئاڤایێ کوردستانێ ژی پشتەڤانیا خوە بۆ خەلکێ سەرێکانیێ دیار کرن و داخواز ژ رێڤەبەریا خوەسەر و بەرپرسێن شامێ ژی کرن کو کارەک باش بۆ ڤەگەرا خەلکی بهێتە کرن، چونکی حەفت سالن خەلکێ سەرێکانیێ د کەمپان دا دژین و رەوشا وان ژی گەلەک خرابە و نها دەم یێ هاتی ئەو ژی وەکو خەلکێ عەفرینێ و دەڤەرێن دی یێن سووریێ ڤەگەرنە ڤە مالێن خوە و دڤێت شام و رێڤەبەریا سووریێ هەم ئاسانکاریان بۆ ڤەگەران وان بکەن و هەم ژی د بیاڤێ ماددی دا هاریکاریا وان بکەن.
