عەلی ئەلزەیدی: هەر بەرپرسەكێ پارێ دزی ڤەگەڕینیت، ئەم دێ لێبۆرین
سەرۆك وەزیرێن ئیراقێ رادگەهینیت، شەڕێ دژی گەندەلیێ بڕیارەكا بێ ڤەگەڕیانە و هەر بەرپرسەكێ پارێ دزی ڤەگەڕینیت، دێ لێ بوورین لێ هێتە كرن. هەروەسا دبێژیت، پترییا گروپێن چەكدار چەكێن خۆ رادەستی دەولەتێ كرینە.
عەلی فالح ئەلزەیدی، سەرۆك وەزیرێن ئیراقێ د هەڤپەیڤینەكێ دا دگەل رۆژنامەیا (شەرقولئەوسەت) راگەهاند، «بڕیارا دوماهئینان ب گەندەلیێ بژاردە نینە، بەلكو بڕیارەكا چارەنڤیسسازە ژ بۆ مانا دەولەتێ».
ئەلزەیدی گۆت ژی، «من فەرمان ب وەزیرێ دارایی كریە هەژمارەكا بانكی یا تایبەت ڤەكەت ژ بۆ وان كەسێن تێكهەلی د گەندەڵیێ دا هەی، دا كو پاران ڤەگەڕینن». هەروەسا گۆت «هەر كەسەكێ پارەی ڤەگەڕینیت، ئەم رێككەفتنا پاقژكرنێ ل گەل دكەین و رێكاران ب نهێنی دهێلین، بەلێ یێ رەت دكەت، دێ هەلوەستەكێ دی یێ مە هەبیت».
سەرۆك وەزیرێن ئیراقێ ئەوژی دیاركر كو، پابەندە ب «قەرەكێ كو ل گەردنا وی یە بەرامبەر ب ئیراقێ». ئاماژە ب وێ ژی كر، «من بڕیار دایە نە مووچەی وەرگرم و نە چو دیارییان قەبوول بكەم، هەتا هەكە بۆینباخەك ژی بیت. دەستێ من بەر مالێ گشتی ناكەڤیت».
ئەلزەیدی رەتكر كو خۆ ژ بۆ ویلایەتا دوویێ یا پۆستێ سەرۆك وەزیران بەربژار بكەت و ئاشكراكر كو چو حیزبێن سیاسی ژی دانامەزرینیت.
سەبارەت ب دۆسێیا گروپێن چەكدار، عەلی ئەلزەیدی راگەهاند، هەتا دووماهییا ئەڤ سالە «كۆنفرانسێ سەروەرییا نیشتمانی» دێ هێتە گرێدان و تێدا تنێ دەولەت دێ خودانا هێزێ بیت، و گۆت»ب كریاری مە چەك ژ سەرایا سەلام، عەسائیب ئەهلولحەق و كەتائیبێن ئیمام عەلی وەرگرتییە و تنێ كێمەك مایە. (موقاوەمە) پێدڤی بوو نە كو پیشە، نها پێدڤی بێ نەمایە و ئەم قەبوول ناكەین دەولەت د ناڤ دەولەتێ دا هەبیت».
سەرۆك وەزیرێن ئیراقێ رەخنە ل كێمییا پشكا ئیراقێ د رێكخراوا ئۆپیك دا گرت و داخوازا زێدەكرنا وێ كر. هەروەسا ئاماژە ب وێ چەندێ ژی كر، ئیراقێ ب نوونەرایەتییا جیهانێ شەڕێ داعشێ كریە و « 400 ملیار دۆلار» زیان گەهشتییە ژێرخانەیا وێ. دبێژیت ژی، «پشكا 4،3 ملیۆن بەرمیلان د رۆژەكێ دا ژ بۆ وەلاتەكێ وەكی ئیراقێ دادپەروەرانە نینە».
سەبارەت ب رەوشا دارایی، رەتكر كو ئیراق د تەنگاڤیێ دا بیت و گۆت، «مووچەیێ فەرمانبەران پاراستییە و دێ بەردەوام بیت. ئەم كار دكەین ژ بۆ گوهارتنا یاسایێن كەڤن یێن سەردەمێ بەعسی یێن كو رێگرن ل هەمبەر گەشەیا ئابۆرییا بازاری».
