فراكسیۆنێن كوردستانى بایکۆتا روونشتنا په‌رله‌مانێ عێراقێ كر
ئه‌ڤرۆ نیۆز،زنار تۆڤى:
ئه‌ڤرۆكه پێنجشه‌مبیێ 3/8/2017 فراكسیۆنێن كوردستانێ ل په‌رله‌مانێ عێراقێ بایكۆتا كۆمبوونا په‌رله‌مانێ كر و وه‌ك نه‌رازیبوونه‌ك هولا په‌رله‌مانى بجه هێلا.
دڤى وارى دا ئۆسمان تاهر دوسكى ئه‌ندامێ لیژنا ئابوورى و وه‌به‌رهێنانێ ل په‌رله‌مانێ عێراقێ بۆ ئه‌ڤرۆ نیۆز راگه‌هاند:كو ئه‌ڤرۆكه په‌رله‌مانێ عێراقێ دا بریارێ ل سه‌ر یاسایا بریكارێن بازرگانى ده‌ت،كو ئه‌ڤه ماوه‌یه‌كێ درێژ بوو مه وه‌ك لیژنا ئابوور و وه‌به‌رهێنانى داكوكى ل سه‌ر هندێ دكر كو مافێن هه‌رێما كوردستانێ د وى یاساى دا بهێنه دیاركرن،هه‌روه‌سا چه‌ندین جاران ژى مه ئه‌ڤ یاسایه پاشخستیه،ژ پێخه‌مه‌ت هندێ كو ئه‌ڤ یاسایه نه‌هێته دناڤا په‌رله‌مانى دا و ده‌نگ ل سه‌ر نه‌هێته‌دان.
ناڤهاتی ئه‌و ژى دیاركر:مه وه‌سا بۆ وان دیاركر بوو،كو رێككه‌فتنه‌ك به‌رى هنگێ ل سه‌ر ڤى یاساى بهێته‌كرن،ژنوو بهێته دناڤا په‌رله‌مانى دا و ده‌نگان ل سه‌ر بهێته‌دان،لێ ل دوماهیێ په‌رله‌مانتارێن فراكسیۆنێن عه‌ره‌بان ئه‌و یاسایه ئینا د هولا په‌رله‌مانى دا و ئه‌ڤرۆكه ده‌نگدان ل سه‌ر وى یاساى هاته‌دان،له‌ورا مه وه‌ك فراكسیۆنێن كوردستانى بۆ هه‌لویست وه‌رگرتن هه‌مبه‌رى ڤى یاسایى مه هولا په‌رله‌مانێ عێراقێ بجه هێلا،مه بایكۆتا وێ كۆمبوونێ كر.
ئەوی پەرلەمانتاری دیاركر ژى،لێ نوكه هه‌ول یێن دهێنه‌دان،كو چ ب رێیا سه‌رۆكێ په‌رله‌مانى بیت،یان ژى ب رێیا كۆمكرنا ئیمزایا بیت،یان ژى ب رێیا سه‌رۆكێ لیژنا هه‌رێمان بیت،كو ئه‌م ب شێین هه‌مواركرنه‌كێ بۆ ڤێ یاسایێ بكه‌ین،داكو سوبه‌هى وه‌لاتیێن مه ل هه‌رێما كوردستانێ چ زیان ڤێنه‌كه‌ڤن.