فڕاکسیۆنا پارتی بزاڤا چارەسەرکرنا رەگەزناما پێنج ھزار ژنێن کوردستانێ دکەت
ئەڤرۆ نیوز، قائید میرۆ:
ئەندامەکێ فڕاکسیۆنا پارتی ل پەرلەمانێ عیراقێ ئاشکرا کر کو بزاڤ د بەردەوامن بۆ چارەسەرکرنا پرسا رەگەزناما پێنج ھزار ژنێن پارچێن دی یێن کوردستانێ یێن پڕۆسا ھەڤژینیێ دگەل زەلامێن ھەرێما کوردستانێ پێک ئینای.
ناسر ھەرکی، پەرلەمانتارێ پارتی ل پەرلەمانێ عیراقێ بۆ ئەڤرۆ نیوز دیار کر کو ھژمارەکا بەرچاڤ یا ئەڤان ژنێن پارچێن دی یێن کوردستانێ یێن پڕۆسا ھەڤژینیێ ل گەل زەلامێن ھەرێما کوردستانێ پێک ئینای ژ مافێ رەگەزناما عیراقی ھاتینە بێ بەھرکرن و نوکە بەغدا یا رازی نینە کار ب رەگەزناما وان بکەت یاکو بەری نوکە ژ لایێ ھەرێما کوردستانێ بۆ ھاتیە دەرکرن.
ناڤھاتی خویا کر کو پێنج ھزار ژنێن کوردێن رۆژھەلات و باکوورێ کوردستانێ ل ھەرێما کوردستانێ ھەنە و ل سەر دەمێ شۆڕەشا گۆلانێ و پشتی سەرھەلدانێ ھەڤژینی ل گەل وەلاتیێن ھەرێما کوردستانێ پێک ئینایە، ل گورەی قانوونا بارێ کەسی یا عیراقێ ھەر کەسەکێ بۆ دەمێ پێنج سالان ل عیراقێ بژیت و چو ئاریشە نەبن، ماف ھەیە ببیتە خوەدان رەگەزناما عیراقێ، ب تایبەتی ئەڤێن ژن و ھەڤژینیێ ل گەل وەلاتیێن عیراقی پێک دئینن و گۆت: “نوکە ئەم وەکو فڕاکسیۆنا پارتی یێ بزاڤان دکەین ئەڤێ ئاریشێ چارەسەربکەین”.
