قانوونا توندوتیژیا خێرانێ دێ ھێتە راستڤەکرن
ئەڤرۆ نیوز، قائید میرۆ:
بڕیارە د خۆلا نوکە یا پەرلەمانێ کوردستانێ دا قانوونا توندوتیژیا دژی خێزانێ و قانوونا سزادانا عیراقی بھێنە راستڤەکرن و رێڤەبەرا گشتی یا بەرھنگاربوونا توندوتیژیێ دبێژیت، قانوون رێگربوویە ل ھەمبەر کارێن مە و دێ گوھۆڕینێن تەمام تێدا ھێنەکرن.
کوردە عومەر، رێڤەبەرا گشتیا بەرھنگاریا توندوتیژیێ بۆ ئەڤرۆ نیوز دیار کر کو بڕیارە د ڤێ خۆلا پەرلەمانێ کوردستانێ دا قانوونا بەرھنگاربوونا توندوتیژیا دژی ژنان و خێزانێ ژی بھێتە راستڤەکرن، لەوڕا پڕۆژە قانوونەک ھاتیە بەرھەڤکرن و نوکە ئەو دگەل ھژمارەکا پەرلەمانتار و مامۆستایێن زانکۆیێ و بسپۆر و کەسێن ئەکادیمی کۆمبووینە و بووچوونا ھەموو لایەکی ھاتیە وەرگرتن ل دۆر چاوانیا راستڤەکرنا قانوونا بەرھنگاربوونا توندوتیژیێ، ھەروەسا ئاژانسێن سەر ب نەتەوێن ئێکگرتی ژی ڤە تێدا د پشکدار بوون.
ناڤھاتیێ ئاماژە دا وێ چەندێ کو ئەو دخوازن ئەڤ ڤالاھیا د قانوونێ دا ھەی ل پەرلەمانێ کوردستانێ بھێتە راستڤەکرن، د ناڤ قانوونا بەرھنگاریا توندوتیژیێ دژی ژنان دا، ھەروەسا قانوونا سزادانا عیراقی یا سالا 1969 یا ھژمارە 111 ھندەک بڕگە ھەنە پێدڤی ب راستڤەکرنێ ھەنە و گۆت: ” گوھۆڕینێن باش دێ د ڤێ قانوونێ دا ھێنەکرن داکو بشێوەیەکێ زێدەتر دەستێ لایەنێن پەیوەندیدار ل دۆر کارکرنێ یێ ڤەکری بیت”.
