قوتابیێن گوندێ شەرانشێ ل ناحیا دەركارێ دەست ب خواندنا خوە كرن
ئەڤرۆ نیوز ، عەلی حاجی :
ژئەگەرێ بەردەومیا توپبارانكرنا گوندێ شەرانشا مەسیحیان و چولكرنا وى ناڤبری ژلایێ گوندیان ڤە، قوتابیێن گوندێ ناڤبری دەست ژ دەواما خوە بەردابوو، رێڤەبریا ناحیا ده‌ركارێ ب هەماهەنگی دگەل رێڤەبەریا پەروەردا زاخۆ رابون ب ڤەكرنا قوتابخانەكێ بۆ قوتابیێن وى گوندى ل ناحیا دەركارێ .
زێرەڤان موسا، رێڤەبەرێ ناحیا دەركارێ بۆ ئەڤرۆ نیوز دیار كر : پشتی بۆ ده‌مێ 15 رۆژان قوتابیێن گوندێ شەرانشێ ژبەر بوردومانا له‌شكرێ توركیا ژخواندنا خوە دووركەفتین ، وەكو رێڤەبەریا ناحیا ده‌ركارێ ب هەڤگاری دگەل رێڤەبەریا پەروەردا زاخۆ رابوین ب دابین كرنا قوتابخانەكێ ل ناحیا ده‌ركارێ دا كو زەحمەتا وان قوتابیان ب هەروە نەچیت و خواندنا خوە یا ئەڤ سالە ب دوماهی بینن و هەمان ستافێ ماموستاێن ل قوتابخانا گوندێ شەرانشێ دەوام دكرن دێ وانەیان ب وان قوتابیان دەن .
ناڤهاتی ئەو چەندە ژی گوت : هەر ئەڤرۆ دوشەمبێ 8/4/2019 دەواما فەرمی یا وان قوتابیان ل ناحیا دەركارێ دەست پێكر ، ژبەر كو پشكەكا وان قوتابیان نوكە دا ل باژێرێ زاخۆ خوەجه بوینە هاتنوچوونا وان قوتابیان مە ب ستویێ خوەڤە گرتیە و ترومبێلەك ژی بو وان هاتیە دابینكرن دا رۆژانە هاتنوچوونێ بكەن و چو كارتێكرنێ ل خواندنا وان قوتابیان نەكەت
