قەرەبووکرنا یاریێن بۆری و سەرکەڤتن ئارمانجا یانێن پارێزگەھێ یە
ئەڤرۆ، محەمەد عەلی:
دھێتە چاڤەرێکرن ئەڤرۆ و سوبەھی ھەرچار نوینەرێن پارێزگەھا دھۆکێ یاریێن خۆ ژ ھەڤرکیێن گەرا سێیێ یێن کۆما ئێکێ و دووێ یا خولا نایابا پێشمەرگە یا کوردستانێ ب ئارمانجا قەرەبوویا یاریێن بۆری و ب دەستڤەئینانا سێ خالێن یاریێ ئەنجامبدەن، ژ کۆما ئێکێ ئەوا یاریێن وان دێ ئەڤرۆ ھێنە کرن کو تێدا یانا دھۆک دێ مێڤانداریا یانا پێشمەرگەیا ھەولێر کەت، دڤێ یاریێ دا ئەلھۆیێن چیایی پێدڤی ب سێ خالێن یاریێ ھەیە ژبۆ زڤرینا وێ بۆ ناڤ ھەڤرکیێن خولێ دا و ئاشکرنا جەماوەرێ خوە پشتی د ھەردو یاریێن بۆریدا تووشی دۆراندنێ بووی و نوکە ل رێزا حەفتێ دوماھیێ دھێت، ژلایێ خۆڤە یانا زێرەڤانی ئەوا نوکە ب دو خالان ل رێزا چارێ دھێت ب دو وەکھەڤیان کو ب ئاستەکێ نەچاڤەرێکری نیشان دایی پێدڤی ب سەرکەڤتنی ھەیە بۆ خوە نێزکبوونا رێزێن پێشیێ دەمێ یانا نەوروز مێڤان دکەت، د ھەمان کۆم دا ھەولێر دێ بیتە مێڤانا گازا باکۆر و برایەتی چاڤەرێیە.
ژلایەکێ دویڤە و چارچووڤێ کۆما دووێ دا ئەوا یاریێن وان دێ سوبەھی رۆژا ئەینی ھێنە کرن، یانا زاخۆ د دیربیێ پارێزگەھێ دا مێڤانداریا یانا گارە کەت، ئەڤ یاریە دێ تامەکا تایبەت ھەبیت بۆ ھەردو تیمان ژبەرکو تیمێن پارێزگەھێ نە و ھەردو تیم دێ بزاڤێ کەن سەرکەڤتنێ تۆماربکەن و پێشڤە بھێنە جھێن باشتر، ژ ھەمان کۆم شێروانە دێ مێڤانداریا ھندرین کەت و سیروانی نوو بیتە مێڤانا کەرکووکێ و ئارارت چاڤەرێیە دڤێ حەفتیێ دا.
لدەستپێکێ ئاماد ئیسماعیل کاپتنێ یانا دھۆکێ گۆت: بۆ ڤێ یاریێ دێ ب ھەموو شیانێن خوە ھێنە دناڤ یاریگەھێ دا و چو ئارمانج مە نینە بتنێ بدەستڤەئینانا سەرکەڤتنێ و سێ خالێن یاریێ بۆ قەربوویا ھەردو یاریێن بۆری، ھەرچەندە یاری ب سانەھی نابیت ھەمبەر تیما پێشمەرگەیا ھەولێر ئەوا ژلایێ خوەڤە ژی دێ بزاڤێن بدەستڤەئینانا خالێن یاریێ کەن، سەرکەڤتن دڤێ یاریێ دا دێ تیما مە لبن گڤاشتنان دەرئێخیت و دوبارە زڤرینیتە ھەڤرکیان، ھیڤیا مە ئەوە جەماوەرێ یانێ بەرھەڤبیت و پشتەڤانیا تیما خوە بکەت ژبەرکو تیم نوکە ژ ھەردەمەکێ دی پێدڤی ب پشتەڤانیا جەماوەری ھەیە.
ژلایێ خۆڤە بارزان ئەحمەد کاپتنێ یانا زاخۆ دیارکر کو ئەو درژدن سەرکەڤتنێ تۆماربکەن و کاروانێ خوە بۆ سەرێ لیستا کۆمێ بەردەوام بکەن و گۆت: ھەرچەندە یاری دناڤ ئەرد و جەماەرێ مە دایە و ئەم بەرھەڤین بۆ ھەر یاریەکا د خولێ دا و یاری د گەل گارە ژی ب سانەھی نابیت ژبەرکو ھەردو تیم دێ بۆ ئێک ئارمانج کەن، بەلێ دڤێت ئەم مفایی ژ ئەرد و جەماوەرێ خۆ وەربگرین و ئێک خال ژ دەست نەدەین، تیما مە یا بێ کێماتییە و ھەموو یاریزان بەرھەڤن، ب ب ھیڤیا وێ چەندی یاریەکا پری خووشی و ھەڤرکی و براینی بیت.
ژلایێ خوەڤە کۆڤان حسێن کاپتنێ تیما گارە گۆت: مە بەرھەڤیێن باش ئەنجامداینە ب تایبەت پشتی پارێزگەرێ دھۆکێ ب سۆپاسی ڤە پشتەڤانیا تیمێ کری ھەموو یاریزان د زاخەکا مەزن دانە و دێ بەرەڤ زاخۆ چین بۆ سەرکەڤتنێ و چو ھزرێن دی مە نینن، ژبیرنەکەین یاری ب سانەھی نابیت دگەل تیما زاخۆ تایبەت دناڤ ئەرد و جەماوەرێ وێ دایە، بەلێ ئەو تیما مفایی ژ ھەر دەلیڤەکێ وەربگریت دێ گۆلێ تۆمارکەت، لەورا دێ بزاڤێ کەین ھەر دەلیڤەکا چێدبیت مفایی ژێ وەربگرین دگەل ھندێ ژی یاریەکا جوان و خووشی بھێتە کرن، تیما مە بێ ھنگاڤتن و کێماتیە و ئەڤەژی پالدەرەک بۆ ھزرا سێ خالێن یاریێ.
لدوماھیێ ئەیوب ئەیاد یاریزانێ تیما زێرەڤانی گۆت: بۆ یاریا مە یا ئەڤرۆ دگەل نەوروز مە بەرھەڤیێن باش ئەنجامداینە و ئارمانجا مە قەرەبوویا ھەردو یاریێن بۆری بکەین و بتنێ سێ خالێن یاریێ مە کرییە پلان و ب بیتە دەرگەھەک بۆ سەرکەڤتنان د کاروانێ مە یێ خولێ دا، دیارە ژی تیما نەوروز بھێز یا دھێتە دناڤ خولێ دا و نوکە سەرێ لیستا خولێ یە ودێ بۆ ڤێ یاریێ وەکو سەرکێشا خولێ ھێنە دناڤ یاریگەھێ دا بەلێ ھەمبەری وێ دزانن ئەو دێ دگەل تیمەکا بھێز و ھەڤرک کەن لەورا یاریەکا ب سانەھی نابیت، ھەروەسا ئەیوبی گۆت: مە پلانێن مەزن ھەنە و تیما مە ھیڤی و ئۆمێدێن سەرکەڤتنان و ھەڤرکیێ بۆ ناسناڤی یا ھەیی و کاروانێ خولێ ژی یێ درێژە، لەورا دێ بزاڤێ کەین بۆ سێ خالێن یاریێ و مفایی ژ ئەرد و جەماوەرێ خۆ وەربکرین.
