قەرەبوویا بهارا پار
قەهرەمان عەبدوللا بەرواری
ئێک:
پێل ل پەی پێلێ
ئاخێ دنكێن خۆ راکێشان چەپ و راست
گۆڕ ڤەبوو و ئاخێ خۆ دا لایان چەپ و راست
هەروەکو چەوان (موسا)ی دارێ خۆ دایە زکێ (دەریایا سۆر) و
دەریا سۆر) بوو دو فلق چەپ و راست)
ئەڤ گۆڕە ما دەڤبەش
جانگۆری وەکو تارماییەکێ رۆبۆتی راست بوو ژپێیان ڤە و
راوەستیا وەکو بەژنا سپیندارێ ب دێمەکێ گەش
گولــلەیەکا سەرپانا تڤەنگێ ژ ناڤ مەتالا سینگێ جانگۆری
هێدی هێدی خۆ خشاندە دەر
پاشدا زڤڕی وەکو مارحلیلان و ماشووتێن ڕەش
گولــلە زڤڕیڤە ناڤ مالبچیکێ زکێ لویلیا تڤەنگێ ب پێ بەزێ
هاواریا وێ د دویڤرا ڤەزڤڕی و ب پێنگاڤێن تێر ژ لەزێ
خوین چپ.. چپ بلند بوو
پاشی فڕی مینا کۆترکێن د سۆری پێچایین
ل دەرازینکا شاهدەمارێن وی یێن شەقشەق کری من دیت رازاین
بەر ل پەی بەری
خۆ هەلاڤێتن
وەکو ماسیێن دەڤێ ریبارێ (نیلی)
ئووو.. ل سەر تەنشتێن ئێک بوونە دیوارێن دەستخەتێن (خدر)ێ زیندی و
ئێدی رویبار نەمان شێلی
گوللــەیا تۆپێ پڕتێن خۆ ڤەچەماندن و
ڕویکێن خۆ ژ شەرمێ سۆرکرن و
دەهمەنێن خۆ راکێشانە عەسمانی و
دەمژمێر ڤەگەڕاند میل ل پەی میلی
دەڤێ تۆپان هێدی هێدی تەماشە کرنە چاڤێن چیایێن پڕ ژ کلی
پێنگاڤ.. پێنگاڤ پاشدا زڤڕین و
رێکا باشوور ل بن پێیان کەل بوو .. کەل بوو و غولغولی
جانگۆری گڕنژی و
پڕی چاڤێن دایکێ بوون
کەیف و سەما و تلیلی
دەرگەهـ هاتنە گرتن و ل سەر تەختێ زاڤانیێ ڕوینشت
و خوەشی پڕی دلی.
دو:
هەر دو کێلی بوونە بۆمبێن (هێرۆشیما و ناگازاکی) د ڕەش و شین
هێدی هێدی وەکو دو شاهماران هاتنە هەلکێشان بۆ عەسمانی ژ جیهانەکا هار و دین
دنکێن ئاخێ وەکو لێمشتا ئاخا سۆر پاشدا زڤڕین
و پاشدا زڤڕین ب لەزگینی
وەکو ئەرتەشا (ئەسکەندەرێ مەزن)
ل هەر چار لایان بەلاڤە بوون ب هویربینی
لێڤێن کفنێ سپی یێ ڕویکێن وێ هاتنە خوار
بوونە ستێرێن ڕژیای ئێک ل دیڤ ئێک
شاپەڕێن خۆ تەڤلی هەڤ کرن و
لەوەندیێن خۆ ڤەکرن ئێک ل دیڤ ئێک
بلند فڕین د هەمبێزا فریشتەیان دا
سەر و بنێن خۆ پێچان و
بوو پەڕۆکەکێ پاکێتکری
دەرسۆکا سپی ژ عەسمانی پەشی
د گەل دا دەزی و تەشی
خۆ د سەرێ وێ پێچا،
ژیان من دیت تنێ ب ڕەنگێ سپی و ڕەشی
رابوو ژپێیان ڤە وەکو دارا هنارێ
گڕنژینەکا پڕی هێمنی ژێ دباری ئەڤێ جارێ
گۆت: وەرە کوڕێ من..
توی بیبیکا چاڤێ من
ب تە گەرمە هەمبێزا من.
سێ:
تڕومبێل ل پەی تڕومبێلێ پاشدا زڤڕین
بۆ مالبچیکێ باژێرێ کەڤنار
ژن و زاڕۆک ژ تڕومبێلا پەیا بوون و
سواری دەرازینکێن خانیا بوون بێ هاوار
د ناڤ جهێن خوە دا تەلاش بوونە ڤە و
پیران خڕخڕ کرن وەکو هەر جار
پێلێن سیانید و خەردەلێ وەکو پەزێ بەلاڤە
جارەکا دی خڕبوونەڤە سەرئێک و
بوونە چپکێن ژەهرا دژوار
د زکێ بۆمبەیاندا حەپسین و
بۆمبە هاتنە هەلکێشان بۆ مالبچیکێن فرۆکەیێن شاپەڕێن زووحاکێن هار
پێنج هزار نڤین د خەوا شیرین دا مانە دخەو.. نەهشیار
پیرێ شەپرزە زاڕۆکێ ساڤا د هەمبێزێ ڕا چکلاند و
رابوو ڤە و پاشدا زڤڕی و پاشدا کرە غار..
چ کەنالان نەناسین ناڤێ (عومەرێ خاوەر)
نە گڕنژین چ ئەژدەهار!