كاره‌با موه‌لیدێن ئه‌هلى بۆ ترافیكان دێ هێته كێشان
ئه‌ڤرۆ نیۆز، رێوار مزیرى:
به‌رپرسێ په‌یوه‌ندى و راگه‌هاندنێ ل رێڤه‌به‌ریا هاتنوچوونا پارێزگه‌ها دهۆكێ تایبه‌ت بۆ مالپه‌رێ ئه‌ڤرۆ نیۆز دیار كر كو كاره‌با موه‌لیدێن ئه‌هلى بۆ ترافیكێن پارێزگه‌ها دهۆكێ دێ هێته كێشان.
رائیدێ مافپه‌روه‌ر ئازاد ته‌ها، به‌رپرسێ په‌یوه‌ندى و راگه‌هاندنێ ل رێڤه‌به‌ریا هاتنوچوونا پارێزگه‌ها دهۆكێ ئاشكرا كر كو پشتى ره‌وشا كاره‌با نیشتیمانى ل پارێزگه‌ها دهۆكێ تێكچووى ترافیكێن پارێزگه‌ها دهۆكێ وه‌كو پێدڤى كار نه‌دكر و گه‌له‌ك ئاریشه بۆ وان په‌یدادبوون ژبه‌ر ڤێ چه‌ندێ بڕیار هاته دان كو كاره‌با موه‌لیدێن ئه‌هلى بۆ هه‌موو ترافیكێن پارێزگه‌ها دهۆكێ بهێته كێشان و گۆت: “كاره‌ب دێ ژ موه‌لیدێن ئه‌هلى یێن نێزیكى ترافیكان هێته كێشان و نوكه كار یێ بۆ ڤێ چه‌ندێ دهێته كرن و ئه‌ز باوه‌رم هه‌تا راده‌كێ باش ئاریشا چوونا كاره‌با ترافیكان دێ چاره بیت”.
ناڤهاتى گۆت: “راسته هنده‌ك ده‌مان كاره‌با نیشتیمانى ژى یا هه‌ى، به‌لێ هه‌ر ده‌مێ قه‌ره‌بالخل ترۆمبێلان ل ترافیكان په‌یدابوو پۆلیسێن رێڤه‌به‌ریا مه نه‌چار دبن كاره‌با ترافیكان ببڕن دا كو قه‌ره‌بالغا ترۆمبێلان د جادێ دا كێم ببیت”.
