كارگه‌هه‌كا درۆستكرنا هنگڤینى ل ده‌ڤه‌را بارزان هاته درۆستكرن
بارزان، نه‌وزاد هلۆرى:
ب مه‌ره‌ما خزمه‌تكرنا جوتیار و مێشه‌ڤانان، كارگه‌هه‌كا تایبه‌ت ب درۆستكرنا هنگڤینى ل ده‌ڤه‌را بارزان هاته درۆستكرن و زێده‌بارى هنگڤینێ ده‌ڤه‌رێ، دشیاندایه هنگڤینى ل ده‌ڤه‌رێن دى ژى وه‌ربگریت.
محه‌مه‌د مێرگه‌سوورى، رێڤه‌به‌رێ چاندنا مێرگه‌سوور بۆ ئه‌ڤرۆ نیوز گۆت: (بۆ ئێكه‌مین جار ل سنورێ قه‌زا مێرگه‌سوور و ده‌ڤه‌را بارزان، كارگه‌هه‌كا تایبه‌ت ب چێكرنا هنگڤینى ل ده‌ڤه‌را بارزان هاته درۆستكرن كو دكه‌ڤیته شانه‌ده‌ر).
زێده‌تر گۆت: (ل سنورێ ده‌ڤه‌را بارزان زێده‌تر ژ 15 هزار سه‌رێن مێشان هه‌نه و شیانێن به‌رهه‌مئینانا زێده‌تر ژ 150 ته‌نێن هنگڤینى هه‌نه، ده‌ڤه‌را بارزان ژى ب ئێك ژ ده‌ڤه‌رێن چیایى و سرۆشتى دهێته نیاسین و تژى يه ژ گول و كه‌سكاتيێ و ده‌ڤه‌ره‌كا باشه بۆ ب خودانكرنا مێشان و ئه‌ڤ هه‌موو مێشه‌ڤانه دێ مفاى ژ وێ كارگه‌هێ بینن بۆ داگرتنا هنگڤینێ خوه و هنارتنا وى بۆ بازارى).
رێڤه‌به‌رێ چاندنا مێرگه‌سوورێ دیاركر ژى كو زێده‌بارى درۆستكرنا كارگه‌هێ، خودانێ وێ كارگه‌هێ رابوویه ب چێكرنا پرۆژه‌‌كێ زانستیێ ب خودانكرنا مێشان كو پترى 400 مێشان ب خوه‌ڤه دگریت و گۆت: (ژبه‌ر ئه‌گه‌رێن گورانكاریێن كه‌ش و هه‌واى و كێم بارینا بارانێ، و سوتنا پيش و پاوانى ل ده‌ڤه‌رێن سنورى و به‌ردوامبوونا بوردومانا فرۆكێن توركیى ب تایبه‌تى ل ده‌ڤه‌رێن زوزان و به‌فرین و هوین ، رێژا به‌رهه‌مئینانا هنگڤینى ل ده‌ڤه‌را بارزان كێمكریه ، به‌لێ هژمارا مێشه‌ڤان و سه‌رێن مێشان زورتر بووینه و داكو مێشه‌ڤانان شاره‌زایه‌كا زێده‌تر هه‌بیت و بشێن باشترین شێوه هنگڤینى به‌رهه‌مبینن، مه وه‌كو رێڤه‌به‌ریا چاندنا مێرگه‌سوور هژماره‌كا خولێن تایبه‌ت بۆ وان ڤه‌كه‌رینه و كه‌سانێن بسپور و شاره‌زا وانه و راهێنانێ ب مێشه‌ڤانان دكه‌ن).
ب گوره‌ى ئاخفتنێن مێرگه‌سوورى، كیلویا هنگڤینى ل ده‌ڤه‌را بارزان دناڤبه‌را 20 هزار بۆ 70 هزار دیناران دهێته فروتن و هنگڤینێ ده‌ڤه‌را بارزان پشكدارى د به‌ریكانێن نێڤده‌وله‌تى و هه‌رێمى دا كریه و ل رێزا پێشیێ دهێت.
ل ده‌ڤه‌را بارزان 72 گوندێن ئاڤه‌دان هه‌نه كو ئه‌و ژى ل سه‌ر پێنج ناحیان و سه‌نته‌رێ قه‌زا مێرگه‌سوور دبه‌لاڤكرينه و ئه‌ڤه زێده‌بارى كو 80 گوندێن ده‌ڤه‌رێ ژى ژبه‌ر به‌رده‌وامبوونا بوردومانێن فروكێن توركیى هه‌تا نها كه‌س نه‌شێت قه‌ستا گوندێن خوه بكه‌ت.