كار دهێتە كرن رێژەیا كەسكاتیێ ل دهۆكێ بگـەهیتە ١٨%ێ
دهۆك، دلۆڤان ئاكرەیی:
شێروان حەسەن، پەیڤدارێ سەرۆكاتییا باژێرڤانییا دهۆكێ تایبەت بۆ رۆژنامەیا ئەڤرۆ دیار كر، ل سنۆرێ دهۆكێ 145 پارك و باخچەیێن بچووك یێن د ناڤ گەڕەك و كۆلانان دا هەنە و 13 پاركێن دی یێن گشتی یێن مەزن ژی هەنە و دبێژیت: كار یێ دهێتە كرن رێژەیا كەسكاتیێ ل دهۆكێ بگەهیتە 18%ێ.
ناڤهاتی خویا ژی كر، پاركا ئالۆكا، كو ئێك ژ مەزنترین پاركێن هەرێما كوردستانێ و ئیراقێ یە ژ لایێ رووبەر و رێژەیا كەسكاتیێ ڤە، نوكە كار تێدا دهێتە كرن و گۆت: «ب دووماهی هاتنا ڤێ پاركێ، ئەم پێشبینی دكەین، رێژەیا كەسكاتیێ بگەهیتە 17 هەتا 18%، هەبوونا ڤێ رێژەیا كەسكاتیێ ل گەل بەردەوام پاراستنا ژینگەهێ دێ ئاستێ پاقژییا ژینگەهێ ل دهۆكێ بلند كەت، حكومەتا هەرێما كوردستانێ بەردەوام دوپاتیێ ل وێ چەندێ دكەت، كو كەرتێ تایبەت و خەلك بخۆ ژی د پرۆسێسا كەسككرنا باژێڕی دا پشكدار بن».
گۆت ژی: «سەرۆكاتییا باژێرڤانییا دهۆكێ ل گەل دانا هەر دەستوورییەكا ئاڤاكرنێ، خودانێ مامەلێ نەچار دكەت پتر ژ دارەكێ د ئاڤاهییێ خۆ دا بچینیت، هۆسا هەر ئێكەیەكا ئاكنجیبوونێ دێ پشكدار بیت د پرۆسێسا كەسككرنێ دا، ل پارێزگەها دهۆكێ هەمی دەستووریێن كارگەهان ژی ل ڕێیێن دوور ژ سەنتەرێ باژێڕی دهێنە دان بۆ هندێ كارتێكرنێ ل سەقایێ باژێڕی نەكەن».
