كاودانێن دارایی نابنه رێگر هه‌مبه‌ری ئارمانجا سێمیَلێ
ئه‌ڤرۆ، محه‌مه‌د عه‌لی:
دهێته چاڤه‌رێكرن ئه‌ڤرۆ ده‌ست ب هه‌ڤركیێن كۆما ئێكێ و دوێ ژ خولا كوردستانێ یا ته‌پاپێ بۆ یانێن پلا دو ئه‌وا ب پشكداریا 32 تیما هاتینه بلاڤكرن لسه‌ر چوار كۆما، دوهی هه‌ردو كۆمێن سێی و چاری یاریێن خوه ئه‌نجامدان، د كۆما دوێ دا هه‌شت تیم ژ وانا سێ یانه ل سنۆرێ پارێزگه‌ها دهۆكێ پشكدارن ئه‌وژی سێمێل، به‌رده‌ره‌ش و شێخان، هه‌ڤركیێن وان بشێوه‌یێ كه‌فتنا دوجاركی دێ هێنه كرن و هه‌ر كۆمه‌كێ دو یانه دێ ده‌ربازبنه قۆناغا دوماهیێ و دووڤدا چار یانێن ئێكێ دێ ده‌ربازبنه پلا ئێكا كوردستانێ.
د یاریا ئه‌ڤرۆ دا به‌رده‌ره‌ش دێ مێڤانداریا سێمێلێ كه‌ت، شێخان دێ بیته مێڤانا پێشه‌سازیا هه‌ولێرێ، خه‌بات دگه‌ل ئاسۆ و هێرش دێ مێڤانداریا زانكویا جیهان كه‌ت.
لدۆر به‌رهه‌ڤیێن یانا سێمیلێ محه‌مه‌د یوسف راهێنه‌رێ تیمێ گۆت: هه‌ر ژ رۆژا وه‌رگرتنا پۆستێ راهێنه‌راتیێ مه هزر لسه‌ر كریه ئه‌م هه‌ڤركیێ بۆ بده‌ستڤه‌ئینانا ئێك ژ پلێتێن ده‌ربازبوونێ بۆ پلا ئێك كه‌ین، سه‌ره‌رایی قه‌یرانا دارایی یا دژوار كارگێریا یانێ یا هه‌موو بزاڤان كه‌ن تیم ب لایه‌نێ دارایی و ده‌رۆنی و ئاستی یا به‌رهه‌ڤبیت.
هه‌روسان ناڤهاتی گۆت: دێ پشتی به‌ستن لسه‌ر پرانیا كورێن باژێرێ سێمیلێ بیت بتنێ سێ هه‌تا چوار ژ ده‌رڤه‌یی سێمێلێ نه، من باوه‌ری ب شیانێن وانه هه‌رچه‌نده پێدڤی ب یاریزانێن شاره‌زاینه لێ بارێ دارایی یێ یانێ نه‌شیاینه په‌یدابكه‌ن.
لدوماهیێ دیاركر كو ئه‌ركێ وان ب سانه‌هی نینه و هه‌موو یانا به‌رهه‌ڤیێن باش كرینه لێ دێ هه‌موو بزڤان كه‌ن ئه‌و ئارمانجا خوه بجهبینن.
