كـوردێن رۆژئـاڤـا ئێدی بندەستیێ قـەبوول نـاكـەن
سەرجان مەحموود
روودانێن ڤان رۆژێن داویێ یێن ل رۆژئاڤایێ كوردستانێ و شەهیدكرنا شەرڤانێ كورد ب رەنگەكی هۆڤانە ڤێ راستیێ بۆ مە هەموویان ئاشكرا دكەت كو ئاشتی و پێكڤە ژیان ب ئیێك ئالی سەرناكەڤیت و چ پرسگرێك و كێشەیان چارەسەر ناكەت. نها دەمێ ڤێ ئێكێ هاتیە كو ئەم راست و دروست بئاخڤین و رەوشا هەی قەبوول بكەین.
د دەمێ خوە دا ل رۆسیایێ سیستەمەكا چاری ئانكۆ شاهی هەبوو، ژیان ل سەر بنەمایا سیستەمێ فیودالی و ئاریستۆكراتی بوو. رۆژەكێ بریار هاتە گرتن و شۆرەشگێرێن بۆلشەڤیكێ ب سەرهلدانا چەكداری شۆرشا ئۆكتۆبەرێ راگەهاندن و بۆ خەلكی گۆتن كو هوون ئێدی نە گوندی، نە بندەستن و ژ ئەڤرۆ پێڤە هوون ئێدی كۆمینیست و كرێكارن. ل رۆژئاڤایێ كوردستانێ ژی خەبات و تێكۆشینەكا گەلەك مەزن هاتەكرن و خەلكێ ل گەل شەڕڤانێن خوە ئەڤ ۱٥ سالبوون داگیركەر، داعشی و كۆمێن چەكدارێن كرێگرتی ژ كوردستانێ دەرخستبوون و سیستەمەكا ل سەر بنەمایێ ئازادیان، پێكڤەژیانێ و كوردستانی ئاڤاكربوون. رۆژەك ژ رۆژان پشتی شەرەكێ گران و دژوار نامەیەك ژ ئەسمانی بۆ سەركردەیێن رۆژئاڤا هات و بریار دان دەست ژ ئازادی و خوەبرێڤە برنێ بەردەن و سیستەمێ و دەستهەلاتێ و ژیانا ئازاد ل گەل عەرەبێن شۆڤینی، چەكدارێن رادیكال و كۆلەپەرەستان پینە بكەن. ڤێجا ناڤێ وێ ژی كرن ئینتیگراسیۆن، یئانكۆ خوە پینە كرن، ئانكۆ ئەم وەسا بێژین رۆناهیێ ب تاریتیێ فەتساندن.
مە د دەستپێكێ دا گۆت، ئەمێ راست و دروست بئاخڤین، ب شەڤ و رۆژەكێ مرۆڤ ژ فیۆدالیێ نابیتە شیۆعی. جلێ پاك و نوو ب جلێ قرێژ و دراییە رە پینە نابیت. گەل و مرۆڤێن ئاشتیخواز و خوەدان كولتوورێ پێكڤەژیانێ و لێبۆرینێ، ب كەلتورێ مللەتەكێ درندە، سەرژێكەر و كۆلەپەرەست رە ئینتیگرە نابیت، ئانكۆ ناگونجیت. روودانێن ڤێ داویێ ژی سەلماند كو دەستهەلاتا ئەحمەد شەرع و عەرەبێن سووریێ ب چو رەنگەكێ ناخوازن دەستهەلاتێ ب كوردان رە پارڤە بكەن و مافێن كوردان ناس بكەن. ب تەكید گەلێ كورد ژی پشتی ۱٥ سالێن ئازادیێ و خوە برێڤەبرنێ ناخوازن ل ژێر سیبەرا دارێن عەرەبێن شۆڤینی دا ژیان بكەن. نها دەم گونجاییە رۆژئاڤا سەرێ خوە راكەت و بۆ فشارێن شامێ بێژیت نا، پەیڤا نا هەلویستە ل هەمبەر زۆرداریێ، رژدیە ل سەر ژیانەكا ئازاد.
هندەك كەسێن كو دخوازن بەرژەوەندیێن خوە یێن تاكەكەسی بمەشینن دبێژن كو شەهیدكرنا سیپانێ شەڕڤانێ كورد نە ب دەستێ دەستهەلاتا شامێ بوویە، وەك شەخس د دەستێ من دا چ بەلگە نینە كو ئەز بێژم شامێ شەڕڤانێ كورد دایە شەهیدكرن، لێ ئەز دشێم ڤێ ئێكێ ب دەنگەكێ بلند بێژم كو دەستهەلاتا ئەحمەد شەرع هەول ددەت ژ رەوشا ئالۆز مفایێ وەربگریت و ئاسایش و شەڕڤانێن كورد ب بێ شیان نیشابدەت و بۆ رایا گشتی بێژیت كو هێزێن كوردی نەشێن پارێزگەها حەسەكێ و كۆبانێ بپارێزن و بۆ ڤێ چەندێ دڤێت ئەم هێزێن لەشكری ژ شامێ بشینن باژێرێن كوردان دا كو ئالۆزیان ژ هۆلێ راكەین. هەر روودان و تشتێن كو ل رۆژئاڤا بقەومیت و د ئەنجام دا د بەرژەوەندیا دەستهەلاتا شامێ دا بیت، ب تەكید راستەخوە یان نە راستەخوە دەستێ شامێ تێدایە.
