(كـوشتنا مـەعـریفێ د ناڤبەرا تەپوتۆز و رەفكێن دیكۆری دا)
چنار ئەحمەد
رەوشەنبیری و مەعریفە ب داهێنانا پەیڤان دهێنە ئاڤاكرن، بەلێ خەمساری و شێوەپەرستی دبنە ئەگەرێ مرنا وان، د چەرخێ پێشكەفتنا ماددی و ئەلكترۆنی دا، پەرتووك روی ب روی جۆرەكێ نوی یێ كوشتنەكا بێدەنگ بوویە كو ب راستی ئەم دشێین ناڤێ وێ بكەینە «گوڕستانا پەرتووكان».
د نوكە دا پتریا مالێن مە بووینە مەزارگەهێن فەرمی بۆ پەیڤا نڤێسای و هەر ئێك ژ مە د مالا خۆ دا گوڕستانەك بۆ پەرتووكێن خۆ ئاڤاكریە، مە یێن كڕین و هاڤێتنە د ناڤ ڕەفكێن مەكتەبەكێ دا و پەردەكا سپی وەكی كفنەكی ب سەر دا ڕاكێشایە، ئەڤە مۆمیاكرنا ڕاستەقینەیا رەوشەنبیریێ یە ب بهانەیا زەنگینكرنا دیكۆرێ مالێ و تژیكرنا مەكتەبێ كو تێدا پەرتووكێ ژ كانیا زانینێ دگۆڕیت بۆ تەرمەكێ بێ گیان.
نەبتنێ د ناڤ مالان دا، بەلكو ئەگەر بەرێخودانەكێ بۆ بازاری بكەین دێ بینی دۆكانێن جوانكاری و مۆبایلان و…هتد؛ هەمی دەمان د تژی مرۆڤن و حەتا مرۆڤ بشێت پسیارا بهایێ تشتەكی ژ كارمەندەكێ وێ بكەت یان بهایێ كەل و پەلێن خۆ بدەت دبیت سرایێ بگریت، بەلێ دەمێ ئەم پێنگاڤێن خۆ بەر ب پەرتووكخانەكێ ڤە دهاڤێژین، بێدەنگییا وێ، دیمەنێ مەزارگەهان ل دەڤ مرۆڤی زیندی دكەت، ئەگەر ب دەمژمێران تێدا بمینی دبیت سەرەدانكەرێن وێ بشێی ب تبلێن دەستان بژمێری.
خۆدانێ پەرتووكخانەكێ دیمەنەكێ دل ئێش ڤەدگێریت و دبێژیت «ڕۆژەكێ كەسەك هاتە پەرتووكخانێ، من ژی ب گەرمی پێشوازی لێ كر و گۆتێ: كەرەمكە مامۆستا، د ناڤ پەرتووكان دا بگەڕیێ و یێن ب دلێ خۆ دەستنیشان بكە، بەلێ وی ب ساڕی بەرسڤ دا و گۆت: هندەك پەرتووكێن ستویر و خۆدان بەرگێن جوان بدە من، ئاریشە نینە هەر چ پەرتووك بن و ناڤەرۆكا وان چ بیت و چ زمان بن، من بۆ خواندنێ نەڤێن! بتنێ جهەكێ ڤالا د ناڤ رەفكێن مەكتەبا مال دا هەیە؛ من دڤێت پێ تژی كەم»
دەمێ هزرا فەیلەسۆف و زانایان دبیتە ئامرازەك بۆ تژیكرنا كونجێن ڤالا یێن دیوار و مەكتەبان، ل ڤێرێ پسیارەكا جەوهەری بۆ ویژدانا جڤاكی و ڕەوشەنبیری دروست دبیت و بلا پسیار بۆ هەوەبیت؛ ئەرێ ما ئەڤا ئەم دكەین نە كوشتن و تیرۆركرنا هزر مێژوو و ناسنامەیا پەرتووكێ یە؟
