كوردستان و فرۆكه‌یێن جاران و نوكه د بیرهاتنه‌كێ دا
د هه‌می سه‌رده‌مێن بووری دا وه‌لاتێن ب ناڤ موسلمان و پرانیا وه‌لاتێن جیهانێ ل كومكوژیێن كوردان ل هه‌ر چار پارچه‌یان بێ ده‌نگی هه‌لبژارت ئه‌ڤجا چ كومكوژی ب بومبه‌یان بت یان ب فرۆكه‌یان یان ژی ب هه‌ر رێكه‌كا دن هه‌می ژ پێخه‌مه‌ت به‌ره‌ڤانیكرن ژما ف و كه‌رامه‌ت و ئاخ و زمان نه‌ته‌وا كورد بوویه، ل هه‌ر چار ئالیێن كوردستانێ ده‌وله‌تێن جیران كورد وه‌كو ته‌په‌كێ هه‌ر ئێكێ ژ لایێ خوه‌ڤه بۆ لایێ دی دهاڤێت و خوینا كوردان و قڕكرن و تالانكرن كیمیاكرن ب سوره‌تێن قورئانێ ل سه‌ر كوردان حه‌لال دكرن و ئه‌وێن ئه‌ڤ چه‌نده ب چاڤ ددیتن ژی ده‌ستخۆشی ل تورك و فارس و سووریێ و عێراقێ دكرن و هنده‌كان ژی چاڤێن خوه دنقاندن هه‌روه‌كو چ نه‌هاتیه روودان مینا هه‌له‌بچه و دێرسم و بارزان قامشلۆ و زێوه و رۆبۆسكێ و ل ده‌مێن بووری دا كوردان چ پشته‌ڤانێن ب هێز نه‌بوون، دیسا چ چه‌كێ ب هێز ژی نه‌بوو ب تنێ بیروباوه‌ره‌كا ب هێز هه‌بوو كو بشێن به‌ره‌ڤانیێ ژخوه بكه‌ن بێ ده‌ستبه‌رداری مافێن خوه یێن ره‌وا ببن ئه‌و ئاخ و وه‌لات و زمان هه‌كه چاڤخشاندنه‌كێ ل سه‌رده‌مێن بووری دا بكه‌ین بێ كا فرۆكێن جه‌نگی یێن وی سه‌رده‌می د چاڤێن كوردان دا ب چ ره‌نگ بوون؟ چونكو هه‌رده‌مێ فرۆكه هاتبا دیتن ل باژێر و گوندو دۆل و نهالێن كوردستانێ كه‌واته ل وی ده‌می ژیان كه‌فته د مه‌ترسیێ دا ژبه‌ر كو چ تشتێ گومانێ و هێڤیێ نه‌بوو كو ئه‌و فرۆكه دێ ژیانا وان پارێزیت به‌لكو به‌روڤاژی بوو ئانكو سه‌دا سه‌د یێن جه‌نگێ بوون و بۆ كوشتنا كوردان ل سه‌ر ئه‌سمانێ كوردستانێ دگه‌ریان ئانكو هه‌ر ده‌مێ فرۆكه هات ئه‌م د ڤه‌جنقین و ترس و له‌زره‌ك دكه‌ڤته د ناخێ مه‌دا و هه‌می پێكول دهاتنه كرن دا كو خوه ژ فرۆكێن بێ دلۆڤان دوور ژمرۆڤاتیێ بپارێزین، نموونه‌كێ بۆ خوانده‌ڤانان دێ بێژم هه‌ر چه‌نده ل وی ده‌می ئه‌ز د ژیه‌كێ بچوویك دابووم ل رۆژهه‌لاتێ كوردستانێ ل سه‌رده‌مێ جه‌نگا ئیرانێ و عێراقێ ل ئوردیگایێ زێوه ئه‌م دئاكنجی بووین و وه‌سا ئه‌م هاتینه فێركرن كور هه‌رده‌مێ فرۆكێن عێراقێ هاتن ب زمانێ فارسی ب بلندگۆیا گازی دكرن (علامه‌تی قرمزی) ئانكو نیشانا سۆر هه‌رنه دژێر زه‌مینان ئانكو جهێن بن ئه‌رد و هه‌كه گۆتبا (عه‌لامه‌تێ سفید) ئانكو نیشانا سپی كه‌واته نه‌ترسن ئه‌و فرۆكێن ئیرانێ نه كه‌واته ل سه‌ر سنورێ هه‌ردو وه‌لاتان ب تنێ كورد دهاتنه كوشتن، لێ ب خوه‌راگریا و ئێكه‌تیا كوردان ب درێژاهیا دیرۆكێ ده‌ست به‌رداری مافێن خوه نه‌بوو هه‌ر چ هات سه‌رێ كوردان هه‌ر دبه‌رده‌وام بوون و ب سیاسه‌تاحه‌كیمانه‌یا سه‌ر كردایه‌تیا كوردی ل باشۆرێ كوردستانێ شیان پێگه‌هه‌كێ ب هێز ژبۆ باشۆر دروست بكه‌ن و د گه‌ل ڤێ چه‌ندێ دا ژی شیان گه‌له‌ك دوژمنان بكه‌نه دوست و ده‌نگێ خوه ب گه‌هینینه پرانیا قولانجێن جیهانێ هه‌ر چه‌نده هاتنا چه‌كدارێن داعش فاكته‌ره‌كێ ب هێز بوو ژ بۆ پێگه‌ها ئیكه‌تیا كوردان لێ ژبه‌ری داعش ل باشۆر پێنگاڤێن باش هاتبوون هاڤێتن و ل شوونا وه‌كی دوهی و جاران ئه‌م ژ ده‌نگێ فرۆكێن جه‌نگی دترسیاین و مه خوه دڤه‌شارت لێ ئه‌ڤرۆ ب گولێ فرۆكه‌یان ژ دوورترین جهێن جیهانێ یێن دهێن و ئه‌م گه‌رمتر دبین چونكو ئه‌ڤ فرۆكه یێن هیڤیێ و پاراستنا گیانێ كوردانه و دیسا ژ لایه‌كێ دیڤه ئه‌ڤرۆ فرۆكه‌یێن فرۆكخانێن باشۆرێ كوردستانێ یێن گه‌شتێن ئه‌سمانی بۆ پرانیا وه‌لاتێن جیهانێ دكه‌ن و ناڤێ كورد و كوردستانێ ل سه‌ره هندی خودانێن بیرۆكه‌یا ب هێزبوونا ئێكه‌تیا كوردان بین هه‌لبه‌ت گه‌له‌ك حنێرێن مه‌زنتر و ده‌ستكه‌فتێن باشتر دی بنه به‌هرا كوردان.
