بەرپرسێ لقێ 15: قەبوول ناكەین خانەقین ب زۆری بهێتە ئەرەبكرن
بەرپرسێ لقێ 15 یا پارتی دیموكراتی كوردستان ل خانەقینێ ڕاگەهاند، ل خانەقینێ پۆلیس و ئاسایش و دادگەه د دەستێ ئەەربا دانە، ب كەیفا خوە هەر كەسەكێ بخوازن دێ دەستەسەر كەن. و گۆت ژی: «ل ڕۆژا دووشەمبی 31/8/2026 هەژمارەكا گەنجێن خانەقینێ هاتینە دەستەسەركرن و فەرمانا دەستەسەركرنێ بۆ 30 كەسێن دی ژی دەركەفتییە».
ئەكبەر حەیدەر، بەرپرسێ لقا 15 یا پارتی گۆت ژی «پشتی هێز و ئالیێن سیاسی یێن كوردی ل خانەقینێ بڕیارا خوەنێشادانێ داین، هێزێن ل دەڤەرێ دەست ب دەستەسەركرنا كوردان و ترساندنا چالاكڤانان كریە، دا كو چو نەڕازیبوون نەهێنە نیشادان».
وی بەرپرسێ پارتی باس ل هندێ ژی كر «پشتێ 16ی ئۆكتۆبەرێ، كوردان ل دەڤەرێ دەستهەلات نەما، و ئەرەب مولكان دكڕن و هەژمارا وان گەلەك زێدە بوویە، د دەمەكێ دا كو ل گۆرەی مادەیا 140 ێ ژ دەستوورێ ئیراقێ، ئەو هەموو نەیاسایی نە».
ئەكبەر حەیدەر گۆت ژی «ئەم دخوازین ل گۆرەی دەستووری ڕێگریێ ل وێ ڕەوشێ بكەین كو دیموگرافییا دەڤەرێ دگوهۆڕیت، بەلێ ژبەر كو ئەوان دەستهەلات هەیە و چو ئالییەك ژی نینە كو ڕێزێ ل دەستووری بگریت، پرۆسەیا ب ئەرەبكرنا دەڤەرێ بەردەوامە».
بەرپرسێ لقێ 15 یا خانەقینێ یا پارتی دیموكراتی كوردستان ئاشكرا كر ژی «ژ ئالیێ هێزا سەربازی یا خانەقینێ ڤە، ل رۆژا دووشەمبی هەژمارەكا گەنجێن خانەقینێ هاتینە دەستەسەركرن، د هەمان دەم دا فەرمانا دەستەسەركرنێ بۆ 30 كەسێن دی ژی دەركەفتییە».
بڕیار بوو كو دژی پرۆسەیا ب ئەرەبكرنێ و بنپێكرنا مادەیا 140 یا دەستووری، ل ڕۆژا دووشەمبی 31/8/2026، ل خانەقینێ خوەنیشادانەك بهێتە ئەنجامدان، بەلێ ژبەر گڤاشتنێن دەستهەلاتا دەڤەرێ، بۆ دەمەكێ نەدیار هاتە پاشئێخستن.
ل گۆرەی گۆتنا وی بەرپرسێ پارتی، خوەنیشادان هاتە پاشئێخستن و چاڤەڕێی نوونەرێن كوردن دا بزانن دێ ل بەغدایێ چ كەن.
دهێتە زانین ل ڕۆژا ئێكشەمبییا بۆری، ئالیێن سیاسی یێن خانەقینێ كۆمبوونەك ئەنجامدابوو، بۆ گەنگەشەكرنا وی شێوازێ نوو یێ «ب ئەرەبكرنێ» كو ل خانەقینێ و دەڤەرێن كوردستانی یێن پارێزگەها دیالە دهێتە پەیڕەوكرن. د كۆمبوونێ دا بڕیار هاتبوو دان كو ل رۆژا پاشتر دووشەمبی 31/8/2026 خوەنیشادانەكا بەرفرەهـ ل ناڤا بازاڕێ خانەقینێ دژی ئینانا ئەرەبێن هاوردە و بنپێكرنا مادەیا 140 یا دەستووری بهێتە ئەنجامدان.
بەرپرسێ لقێ پارتی ل باژێڕێ خانەقینێ ئاماژێ ب هندێ دكەت كو هێز و ئالیێن سیاسی یێن باژێڕی ل سەر هێلن دا كو بڕیارێن گرنگ و پێدڤی ل سەر ڕەوشا دەڤەرێ بهێنە دان، چونكی نابیت ڕێ بهێتە دان كو ب سانەهی ئەو دەڤەر ب زۆری بهێنە ب ئەرەبكرن و ئەم ژی ببینە تەماشەڤان و ئەم وێ چەندێ قەبوول ناكەین.
