كوشتنا قاسم سولهیمانى مینا دهسپێكهكا نوى
كامى كهمال
ئیران د ههمبهر كوشتنا سلێمانى دا
بۆیهرێن كوشتنا قاسم سولهیمانى نهك تنێ نههێلانا فهرماندهیهكێ ب هێزێ سهربازیێ ئیرانێ بوو د گۆرهپانا سیاسى و سهربازیا دهڤهرێ دا، بهلكى ئینانا قووناغهكا نوى یا سیاسى بوو ل رۆژههلاتا ناڤهراست، پێناسهیا كهسایهتیا سولهیمانى ل جهم خهلكێن ئیرانێ ب ئاوایهكێ ئهفسانهیى بو كو ئهو دكاریت ب ساناهى ههڤكێشهیێن سهربازى و ئهولههى ل دژى ههمى وهلاتهكێ د بهرژهوهندیا سیاسهتا ئیرانێ دا ب دووماهى بینیت و تنێ د حالهتهكێدا دبیت، دوژمنێن وان بشێن دربهكێ لێ بدهن دهمێ ب تهمامى وهلاتێ وان ژ لایێ سهربازیڤه دادرۆخیت..
ئهمریكا و ئیسرائیلێ گهلهك جاران د دیرۆكا خوهدا بنكهیێن ئهتۆمى یێن ئیرانێ و ئهو بارهگایێن سهر ب تههرانێ ڤهنه یێن بۆمبهباران كرین، لێ ژنشكهكێڤه نۆچهیێ كوشتنا مهزنترین و ب هێزترین فهرماندهیێ وان یێ سیاسى و سهربازى كو رۆلهكێ مهزن د ئاراستهیێن سیاسهتا دهرڤهیا ئیرانێ دا ژى ههبوو، بۆ خهلكێ ئیرانێ شۆكهكا مهزن و باوهرنهكرى بوو.
ههلبهت كوشتنا قاسم سولهیمانى بۆ ئیرانێ بخوه ژى ب تنێ ژدهستدانا فهرماندهیهكێ مهزن نهبوو، ئیران د نها دا یا ڕاستى ئێحراجهكا سیاسى یا مهزن بۆى، ههم ژلایێ خهلكێ ئیرانێ ڤه و ههم ژى ل سهر ئاستێ نێڤدهولى و دهڤهرێ ڤه، ژبهركو د چاڤێن خهلكێ خوه و ههڤپهیمانێن خوه دا، ئیران دارهك نینه ب ساناهى بهێته ههژاندن و ریشهكێش كرن، و ههمى دهما گهفێن ژناڤبرنا ههڤڕك و دۆژمنێن خوه دكهت، لهوما خهلكێ وێ ب گشتى و ههڤپهیمانێن وێ چاڤهرێى كارڤهدانهكا مهزن و بهرسڤهكا ژههژى قوربانیبوونا فهرماندهیێ وانن ل حوكمهتا ئیرانێ دكهن.
ئهمریكا بوچێ سلێمانى كوشت؟
كوشتنا قاسم سولهیمانى بۆ ئهمریكایێ ژى ب تنێ ژناڤبرنا فهرماندهیهكێ مهزنێ ئیرانى نهبوو، ب وێ بۆیهرێ ئهمریكایێ چهندین پهیامێن جودا جودا دانه ئیرانێ، ب دیتنا من ئهمریكایێ ههندهك ئهگهر (فاكتهر) ئافراندن كو قووناغهكا نوى یا سیاسى بگریتهبهر، كو دهێته چاڤهرێ كرن قووناغێن سهربازى و دژوار بن بۆ ئیرانێ، و ب ڤێ كریارا سهربازى ل دژى ئیرانێ، ئهمریكایێ گوته ئیرانێ كو ههردهمێ مه بڤێت ب رێیا تهكنۆلوژیا پێشكهفتى و سهربازییا خوه دێ شێین ههستیارو بهێزترین خالێن وه یێن سهربازى ب پێكین و ژناڤ ببهین، ههروهسا ئهمریكایێ ئیران ئێخسته ددۆخهكێدا داكو گهرهكه كارڤهدانهكا ب هێز ئهنجام بدهت و ب كێمى ڤه لایهنێ مهعنهوى یێ خهلكێ وێ و ههڤپهیمانێن وێ زیندى ببیتهڤه، ههلبهت خالا ههستیار بۆ ئیرانێ ژى كود بیت لێ بترسیت ئهڤهیه كو ئهمریكاژى چاڤهرێى كارڤهدانهكا سهربازى یا ئیرانێ بیت داكو بكهته بههانهو ئیرانێ ڕاكێشیته د شهرهكێ مهزن دا، یان ژى ب كێمى ڤه بههانهیان دروست بكهت داكو بنگههێن وێ یێن ئهتۆمى بۆمباران بكهت..
د نها دا ئیران یا كهفتیه د دۆخهكێ ههستیاردا، پاشڤهچوونا وێ ئانكو ئهگهر تۆلێن كوشتنا قاسم سولهیمانى نهڤهكهت، ههم دێ خهلكێ وان و ههڤپهیمانێن وان ل هێز و درووشم و پرۆپاكندهیێن حوكمهتا ئیرانێ كهڤنه گۆمانێ و بێ هیڤى بن، ههم ژى دێ ئوپۆزسیون و بهرهیێ خوهنێشاندانان ل ئیرانێ ب هێز كهڤیت، ههكه ئیرانێ پێنگاڤان ژى ب هاڤێژیت و تولهیێن سولهیمانى ڤهكهت، دیسا دبیت ڕاستى شهرهكێ ببیت كو سهركهفتن بۆ وێ دبیت یا مهحال بیت.
عیراق پشتى كوشتنا سولهیمانى
ژبلى كو عیراق كو ههڤسنۆر و ههڤپشكه د گهلهك بهرژهوهندیێن ئابوورى و سیاسى و جڤاكى ڤه دگهل ئیرانێ، دهسهلاتا عیراقێ د نها دا یا ل ژێر كونترۆلا وان كهسایهتیان یێن كو ب مهرجهعیهت و سیاسهتا تایفهگهرایهتیێ ڤه دگرێدایى، حوكمهتا عیراقێ ل ههمبهرى هێزا مهرجهعێن شیعهڤه خوه گهلهك لاواز و بێ دهسهلات دبینیت و چو حوكمهتهك ل بهغدایێ د نها دا نكاریت بێ ڕهزامهندیا دلێ سیستانى و هندهك كهسایهتى یێن دیتر یێن مینا موقتهدا سهدر سهركهفتنێ بینیت (ههلبهت ئهڤه دیفاكتۆیه)، خالا ههڤپشك یا د ناڤبهرا مهرجهعێن عیراقێ و ولاتێ ئیرانێ ڤه، تایفهگهرایی و دیرۆكا ههڤپشكا مهزههبی یه، ههروهسا پترین سهركردهیێن شیعه یێن عیراقێ تهمهنهكێ یێن ل ژێر پهروهردا سیاسهتا ئیرانێ دا فێربووى و ب زهحمهته بشێن یێن سهربخوه بن د بریارێن سیاسى یێن عیراقێ دا، ئهگهر چ ئهمریكایێ دهستههلاتا بهعس ژناڤبر و گۆرهپانا دهسهلاتێ بۆ شیعهیێن عیراقێ ب پلا ئێكێ ڤالا كر لێ ب ڤى كارى ژى ئهمریكا نهشیایه ئهو پهیوهندیێن سۆزدارى و فهرههنگى یێن د ناڤبهرا شیعهیێن عیراقێ و ئیرانێ دا ههى ب ئاوایهكێ لاواز بكهت كو، ژبهر ڕازیكرنا دلێ ئیرانێ شیعهیێن عیراقێ دوژمنایهتیا ئهمریكایێ ل دهڤهرێ نهكهن!، لهوما ئایندهو چارهنڤیسا دهسهلاتا ئیرانێ و حوكمهتا د جهوههر دا تائیفگهرایى یا عیراقێ یێن پێكڤه گرێداینه.
ههرێما كوردستانێ و بۆیهرێن نوى
ههرێما كوردستانێ د نها دا ناخوازیت تێكههلى كێشهیێن د ناڤبهرا ئیرانێ و ئهمریكایێ دا ببن و سهربخوهبوونا خوه دپارێزیت، ئهولههیا سنۆرێن ل گهل ئیرانێ بۆ كوردان دگرنگن. سهبارهت ب بۆیهرێن كوشتنا سولهیمانى ل بهغدایێَ كوردژى نكارن ژبیر بكهن كو تههرانێ د بۆیهرێن 16ـهى ئوكتۆبهرێدا ب پشتگیریا حهشدا شهعبى ل دژى دهسهلاتا كوردان ل ههولێرا پایتهخت رۆلهكێ زۆرێ نێگهتیڤ ههبوویه، لهوما دبیت ههسۆزى و ههڤخهمیهكا گهرم و ژدل یا كوردان ل گهل ولاتهكێ كو بێ ههبوونا چو ئهگهر و بههانهیهكا لۆژیك خواستا ژناڤبرنا وان ههبوو كارهكێ لۆژیك و شایسته نهبیت.
داكو كوردستان ڕاستى پهرمیچكێن ئاگرێ شهڕ و كێشهیێن د ناڤبهرا ئیرانێ و ئهمریكا دا نهبیت، پێدڤیه ههرێما ئهولههیا قونسولگهرى و نوونهرایهتى و دبلۆمان و كهسایهتى یێن بیانى ل كوردستانێ ب هشیارانه بپارێزیت، بینینه بهرچاڤێن خوه ئهگهر قاسم سولهیمانى ل ههولێرێ هاتبایه كوشتن، دا كوردستان ڕاستى چ دوژمنكاریهكا تایفهگهرى بیت؟، د ڤان سالێن دهربازبوویی دا كو ههرێما كوردستانێ بوویه قهوارهیهكێ سیاسى یێ ب هێز ل دهڤهرێ بهردهوام ئالایێ ئاشتیێ یێ بلندكرى و داخوازا دۆستایهتیێ و ڤهكرنا لاپهرهیێن نوو یێن كرى ههتا ل گهل وان وهلات و لایهنان یێن كو دهست د كوشتارا كوردان و وێرانكرنا كوردستانێ دا ههبووى، بۆ بهرژهوهندیێن كوردستانێ و سهركهفتنا پرۆسا سیاسى یا كوردان، پێدڤیه كورد بهردهوام ب لۆژیكى و ئارامى سهرهدهریێ ل گهل وان كاودانان بكهن یێن كو دهێنه چاڤهرێ كرن یێن دژوار و ب هێز بن.