كوشتيێن هێرشا ل سه‌ر مزگه‌فته‌كا مسرى بوونه 235 كه‌س
ئه‌ڤرۆنيۆز:
ل دووڤ داخۆيانيێن ده‌زگه‌هێن ئه‌منى يێن مسرى بۆ ته‌له‌ڤزيۆنا مسرى يا فه‌رمى، هژمارا قوربانيێن وێ هێرشا ل سه‌ر مزگه‌فته‌كێ ل پارێزگه‌ها باكوورێ سينا گه‌هشتنه 235 كوشتيان و109 برينداران.
ئه‌ڤرۆ هژماره‌كا چه‌كداران هێرش كره مزگه‌فته‌كێ ل گوندێ ره‌وزه يێ ب سه‌ر باژێرێ ئه‌لعريش سه‌نته‌رێ پارێزگه‌ها باكوورێ سينا يا مسرى، ده‌مێ نڤێژكه‌ر ژمزگه‌فتێ ده‌ردكه‌فتن.
ده‌زگه‌هێن رۆژنامه‌ڤانى، پشتى ئه‌نجامدانا هێرشى، ئامارێن ده‌ستپێكى يێن قوربانيان به‌لاڤكربوون كو 54 كوشتى و75 بريندار وپێشبينيا بلندبوونا هژمارا قوربانيان ژى كربوو، پشتى چه‌ندين ده‌مژميران ژ وێ روودانێ هژمارا كوشتى وبرينداران گه‌له‌ك زێده‌تر بوون.
كه‌نالێ (سكاى نيۆز) ژزارده‌ڤێ هنده‌ك ژێده‌رێن ئه‌منى يێن مسرى ڤه‌گۆهاست، پشتى ئه‌نجامدانا وێ هێرشى، دو فرۆكێن بێ فرۆكه‌ڤان يێن مسرى شيان دو ترومبێلان ل ده‌ڤه‌رێ نێزيك گوندێ هێرش لێ چێبووى، ژناڤ ببه‌ن كو هژماره‌كا چه‌كداران دناڤ وان ترومبێان دا هه‌بوون، دئه‌نجامدا 15 چه‌كدار هاتن كوشتن.
