كوڕ يان كچ پتر تووشى ديناتيا ئه‌ڤينيێ دبن؟
ئەڤرۆ:
(ئەز بۆ تە دین دبم)، ئەڤە ھێمایێ پتریا ئەڤیندرانە و دەمێ زێدە حەز ژ ئێکدو بکەن خوە بۆ ئێکدو دین دکەن، بەلێ ئەڤە راستیەکە و ناھێتە ڤەشارتن کو د زانستێ دەروونی دا حالەت ھەنە ھنەک کچ یان کور د ئەڤینیێ دا دین دبن. تایبەتمەندەکێ دەروونی ژی دوپاتکر کو گەلەک جاران کچ یان کور د ئەڤینیێ دا دین بووینە، بەلێ دیناتیا وان یا مەترسیدار نینە و بۆ دەمەکی یە و پشی ھینگی جارەکا دی وەکو بەرێ ڤەدگەرنەڤە.
ب جلکێن سۆر و بەژنا خەملاندی و چاڤێن کلدای و لێڤێن سۆرکری قەستا نوژدارێ دەروونی کر، ب گرنژینەکا تایبەت ڤە بەحسێ دەزگرێ خوە یێ ئایندەی کر، ھەر تەڤڕەک ل جھەکی ددا، وێ ب خوە ژی نەدزانی بەحسێ کیژ سەیدای دکەت، ب تنێ د گۆت سەیدا حەز ژ من دکەت، جار دگۆت وەزیرە و جار دگۆت دادوەرە، بەلێ نوشدارێ دەروونی د دلێ خوە دا زانی ئەڤ کچە یا تووشی دیناتیا ئەڤینیێ بووی. پشتی تووشی ڤێ نەخۆشیێ دبیت قەستا نوژدارێ دەروونی دکەت، ل دەڤ نوژداری چیرۆکا خۆ یا سەیر بەحس ژێ دکەت و دبێژیت: ئەز حەز ژ کەسەکی دکەم دادوەرە، ل ھەولێرێ دەوامێ دکەت، ئەو گەلەک یێ ئەنانیە و بەس حەز ژ خوە دکەت و چو جاران پووتە ب من ناکەت و ل گەل من نائاخڤیت.
د. سالم ئەلحەکیم، تایبەتمەندێ نەخۆشیێن دەروونی دیار کر، ئەڤ کچە تووشی نەخۆشیا دیناتیا ئەڤینیێ (جنون الحب) بوویە، کەنگی ئەڤ نەخۆشیە ل دەڤ مرۆڤان پەیدا دبن، ھەکە ھات و کچ پیچەک مەزن بوو و کەس ل دەوروبەری خوە نەدیت حەز ژێ بکەت، دێ رابیت حەز ژ کەسەکێ ئاست بلند کەت، وەکو خەیالەکێ د سەرێ خوە دا دروست کەت کو ئەو ژی حەز ژ وێ دکەت و گۆت: (پتریا جاران کچ تووشی ڤێ نەخۆشیا دەروونی دبن). گەلەک جاران ئەڤ حالەتە پەیدا دبن، جارەکێ کچەک ھاتە دەڤ من گۆت فرۆکڤانەک حەز ژ من دکەت، چەوا؟ دەما فرۆکە ل سەر مالا وان را دبۆریت سیتافک ل ئەردی ددەت، د گۆت ئەو سیتافک ئیشارەتن خودانێ فرۆکێ ددەتە من و حەز ژ من دکەت. کچەکا دی گۆت رێڤەبەرێ تەلەڤزیونێ ھەڤژینێ منە و ھەردەم ل شەریتا بنێ تەلەڤزیونێ ئیشارەتا و ئاخفتنێن جوان بۆ من فرێ دکەت ئەو ھەڤژینێ من و ئەز چو جاران شوو ناکەم. د. سالم ئاشکرا کر کو ئەڤە ب تنێ خەیالەکە د سەرێ کچان دا پەیدا دبیت و پێدڤی ب چارەسەریێ نە دا کو نەخۆشیا وان زێدەتر لێ نەھێت و خوشتڤیێن وان مرۆڤێن وەھمی نە و چو ھەبوون ل سەر ژیانێ بۆ وان نینن. نوشدارێ دەروونی دیار کر کو ئەڤ نەخۆشیە گەلەک یا مەترسیدار نینە و و بۆ دەمەکی یە و رەنگە پشتی ھینگی جارەکا دی وەکو بەرێ ڤەدگەرنەڤە.
