لیژنا ڤەکۆلینێ ل سەر رەوشا شنگالێ دەستبکاربوو
ئەڤرۆ نیوز، لەزگین جوقی:
ئەندامەکێ جڤاتا نوونەرێن عیراقێ دیار کر کو ئەڤرۆ رۆژا ٣/٢/٢٠١٩ لیژنا ڤەکۆلینێ ل سەر رەوشا شنگالێ دەست ب کارێ خوە کر و ل دەستپێکێ دێ دگەل ئیدارا شەرعی یا شنگالێ و پارێزگارێ نەینەوا و جڤاتا مووسل روونیت و دێ ھەموو تشتەکی ل سەر رەوشا شنگالێ ئاشکراکەت.
شێروان دووبەردانی، ئەندامێ جڤاتا نوونەرێن عیراقی بۆ ئەڤرۆ نیوز دیارکر کو ئەڤە بۆ جارا ئێکێ یە لیژنەک دھێتە دروستکرن بۆ وێ چەندێ ھەموو راستیان دیار کەت و گۆت: ” دێ ڤەکۆلین ل دۆر ئیدارا شنگالێ ھێتەکرن کا ب چ شێوە ھاتینە دانان و دێ ھەموو فەرمانێن دەستبکاربوونێ ژێ ھێنە وەرگرتن داکو راپورتەکا بەرفرەە ل سەر شنگالێ بھێتە بەرھەڤکرن و دێ راپۆرت بۆ پەرلەمانێ عیراقێ ھێتە بلندکرن داکو روونشتنەکا پەرلەمانێ عیراقێ ل سەر شنگالێ بھێتە ئەنجامدان”.
ژ ئالیێ خوە ڤە وەیس نایف، سەرۆکێ جڤاتا قەزا شنگالێ بۆ ئەڤرۆ نیوز دیار کر کو پەرلەمانێ عیراقێ ئەو ل سەر پێکئینانا لیژنەکا ڤەکۆلینێ ل سەر رەوشا شنگالێ ئاگەھدارکرینە کو ئەڤ لیژنە دێ قەستا ناڤ کەمپێن ئاواران و شنگالێ کەت کا بۆچی ئاوارە نازڤرن و بۆچی شنگال ناھێتە ئاڤەدانکرن و گەلەک بابەتێن دی یێن گریدایی رەوشا شنگالێ دێ ل گەل خەلکی ئازرینن و دێ ھەموو تێبینی و پێشنیار و داخوازیێن خەلکی و ھەموو ئێش و ئازارێن ئاواران بینن و دێ ب راپۆرتەکێ کۆم کەن و دێ بۆ پەرلەمانی بەن و دێ گەلەک دووپاتیێ ل سەر دوسەیا ئەمنی یا شنگالێ کەن، چونکو نابیت دوسەیا ئەمنی یا شنگالێ بمینیتە د دەستێن لایەنێن نەقانوونی دا.
ناڤھاتی ئاماژە دا وێ چەندێ کو پەرلەمانێ عیراقێ سوزدایە پشتی لیژنە کارێ خوە ب دووماھی دئینیت پەرلەمان دێ روونشتنەکا تایبەت ل سەر رەوشا شنگالێ ئەنجام دەت و گۆت: “ئەم چاڤەرێ نە بڕیارێن باش بۆ ئاسایکرنا رەوشا شنگالێ و ئاڤەدانیا وێ بھێنە دان”.
