لەھیان زیان یێن گەھاندینە گۆڕێن ب کۆم
ئەڤرۆ نیوز، لەزگین جوقی:
ئەندامەکێ جڤاتا قەزا شنگال بۆ ئەڤرۆ نیوز دیار کر کو بارانێن ل ڤێ دووماھیێ ھاتین گەلەک زیان یا گەھاندیە گۆرێن ب کۆم ل شنگالێ، لێ ھێشتا زیان نەھاتینە دەست نیشانکرن.
خەلیل حەسەن، ئەندامێ جڤاتا قەزا شنگال بۆ ئەڤرۆ نیوز دیارکرکو ئەو گۆرێن ب کۆم یێن ل بەر دەرێ گەلی نە یێن کو خەلکێ شنگالێ ژ لایی رێکخراوا تیرۆرستێن داعش ڤە ل رۆژا ٣/٨/٢٠١٤ تێدا ھاتینە گوللەبارانکرن، نوکە لەھیێن بارانێ زیان گەھاندیە وان گۆرێن ب کۆم و ھێشتا زیان نەھاتینە دەست نیشانکرن.
ناڤھاتی ئاماژە دا وێ چەندێ کو دەمێ پێشمەرگێ کوردستانێ شنگال رزگارکری ئەو گۆرێن بکۆم ھاتنە پەرژانکرن، لێ نوکە لەھیێن بارانێ ئەو پەرژان خرابکریە و کەس ل دەڤەرێ نینە چاڤێ خوە بدەتە وان گۆڕان داکو بھێنە پاراستن ھەتا دھێنە ڤەکرن.
ل دووڤ ئامارێن رێڤەبەریا گشتی یا کاروبارێن ئێزدیان د رۆژێن ئێکێ دا ژ جینوسایدا شنگالێ ھزار و ٢٩٣ کەس ھاتینە شەھیدکرن و شەش ھزار و ٤١٧ کەس ژی ھاتبوونە رەڤاندن ژ وان سێ ھزار و ٥٤٨ ژن بوون و دو ھزار و ٨٦٩ زارۆ و زەلام بوون و ھەتا نوکە سێ ھزار و ٣٣٤ کەس ژ دەستێن تیرۆرستێن داعش رزگاربووینە، لێ ھێشتا گەلەکێن دی ژی د دیار نینن.
