ل بەر پەنجەرێ
ڕێژین حکمەت
ل بەر پەنجەرێ…
من شەڤ کرنە سپێدە،
سپێدە ژی بوونە ئێڤار!
دووراتییەکێ پەنجەرا مالا مە ئاسێ کر،
و غەریبییەک د دلێ من دا چاند
چاڤێن خۆ ل ڤی ئالی دزڤڕینم،
دەنگێ تە ناهێت
ل ئالێ دی دزڤڕینم،
تە نابینم،
و بێهنا تە ناگەهیت…
شەڤ بۆ شەڤێ،
ئەو غەریبی د ناخێ من دا مەزن بوو
ڕۆژ بۆ ڕۆژێ،
دلێ من گازندەیێن نەبوونا تە دکر…
هندی هاوار دکەم،
دەنگێ من ژ سنوورێن ڤی باژێری دەرناکەڤیت!
چاڤێن من ژ شاشا موبایلێ ڤەنابن،
نامەیەک ژ تە ناهێت،
دا من ژ بەر ڤێ پەنجەرا سار ڕاکەت
کیسکێ خۆزیان ل بەر پەنجەرێ تژی بوو،
خۆزی یێن ژبلی چونەهیێ
چ تشتێ دی تێدا نینە!
پا دێ چ بۆ من مینیته ل بەر پەنجەرێ؟
تنێ دیمەنەکێ قورمچی،
پرچەکا موی یێن وێ سپی بووین،
و نالینەکا ناخهەژین
بەرێ من ب خۆدیکێ دکەڤیت،
من نەڤێت خۆ د ناڤ دا ببینم!
چاڤێ من ب سیتافکا من دکەڤیت،
کەیفا من ب بەژنا من یا جاران دهێت؛
ئەو بەژنا دەمەکێ
تو بۆ دمری،
نوکە یا ل بەر بایێ پیراتیێ دحەلیێت،
چ نەمایە دێ ئەو ژی گۆری تە بیت،
و ژ گەشبوونێ… هشک بیت!
